ЦИФРЛЫ ӘЛЕМНІҢ СЫРЫ НЕДЕ?

0
169

Күн санап көркейіп келе  жатқан Астана  әлемдік деңгейдегі басқосулар мен халықаралық шаралар өтетін, маңызды мәселелер түйіні шешімін табатын қолайлы ортаға айналды. Еңсесі биік Елордада шымылдығын түрген Digital Bridge халықаралық инновациялық форумы соның айғағы. Төрткүл дүниеден келген қатысушылар Қазақ елінің төрінде бас қосып, цифрландыру саласындағы соңғы әлемдік трендтерді талқылады.

Астанада ҚР Ақпарат және коммуникациялар министрлігінің ұйымдастыруымен, «Зерде» Ұлттық инфокомуникация холдингі» АҚ және Astana Hub халықаралық технопаркінің қолдауымен өткен «Digital Bridge» халықаралық инновациялық форумға Қазақстан Республикасы Премьер-министрі Бақытжан Сағынтаев, Эстония Премьер-министрі Юри Ратас, Қазақстан Республикасы Премьер-министрінің орынбасары Асқар Жұмағалиев, Қазақстан Республикасы Ақпарат және коммуникациялар министрі Дәурен Абаев, Ресей Федерациясының цифрлық даму, байланыс және бұқаралық коммуникациялар министрі Константин Носков, халықаралық ІТ-қоғамдастығының өкілдері, технология саласындағы танылған сарапшылар, кәсіпорын басшылары, технологиялық кәсіпкерлер, басқа да елдердің мемлекеттік секторларының өкілдері, ғалымдар, цифрлық саланың мамандары, сонымен қатар, венчурлық ұйым өкілдері мен инвесторлар қатысты.

Халықаралық іс-шараның басты мақсаты – Еуропа мен Азия елдерінің арасында диалог алаңын құру арқылы цифрлық трансформация, электрондық үкімет, технологиялық кәсіпкерлік және 4-ші индустриалдық революция идеяларын ілгерілету.

Форумды ашқан ҚР Ақпарат және коммуникациялар министрі Дәурен Абаев алғы  сөзінде: «Форумға 2,5 мыңнан астам қатысушы келіп отыр. Сондай-ақ, әлемнің алдыңғы қатарлы компаниялары мен ұйымдарының 200 жетекшісі, мыңдаған инвестор мен түрлі стартап жоба авторлары бар. Осылайша, алға қойған мақсатымыздың жүзеге асуына даңғыл жол ашылды. Өйткені, жобаның басты идеясы – тың идеялардан қуат алып, өзара тәжірибе алмасу, Азия мен Еуропа технологиялық орталықтарының арасында алтын көпір болу», – деді.

Басқосуда сөз алған ҚР Премьер-министрі Бақытжан Сағынтаев Астана алаңында Еуропа мен Азияның арасын жалғайтын виртуалды көпір құру – бұл іс-шараның басты мақсаты екенін тілге тиек етіп, халықаралық форумға көптеген компанияның келгендігін және олардың бір-бірімен байланыс орната бастағандығын атап өтті.

«Әлем жылдам өзгеруде және бүгінде байланыстар табу үшін бір-бірімізге жиі баруымыз қажет. Байланысты Интернеттің көмегімен де орнатуға, өзіңнің пікіріңмен бөлісуге мүмкіндік бар. Сондықтан, бұл форум болашақта өз жалғасын тауып, жыл сайын кеңейе түседі деп ойлаймыз. Бұл үлкен байланыстар жасалатын алаңға айналады», – деді Үкімет басшысы.

Форум алаңында 50-ден аса қазақстандық және халықаралық спикерлер сөз сөйледі, олардың ішінде «Startup Genome» бас директоры Жан-Франсуа Готье, «CEO Hyperloop Transportation» басшысы Дирк Алборн, Стартап академиясының менторы және кеңесшісі, стартап тақырыбы бойынша сатылымға ең көп шыққан кітаптың авторы Боб Дорф, «Галактика» ғарыш компаниясының негізін қалаушы және иесі Алия Прокофьева, «Priceline Group» негізін қалаушы Джефф Хоффман, венчурлық капиталдың халықаралық фирмасы «Global Catalyst Partners» төрағасы және тең мердігері Камран Элахиан бар.

«Digital Bridge» халықаралық инновациялық форумы алаңында «Astana Hub» бас атқарушы директоры Джозеф Циглер Қазақстанда инновацияларды дамыту бойынша өз көзқарасымен бөлісті.

«Мен мұнда Қазақстан экожүйесін құруға көмектесу үшін келдім. Біз осында экожүйені құруға жәрдемдесетін, тәжірибесі бар талантты шетелдік мамандарды тартудан бастаймыз. Біз көп нәрсе істеуіміз керек: венчурлық капитал жүйесін құрып, технологияларды дамытып, пайдалы әрі қызықты мансапқа жету үшін жастарды тарту керек. Іс жүзінде, біз бүкіл экономиканы ілгері жылжытып, оны идеялар мен кәсіпкерлерге негізделетін етіп жасауды қалаймыз. Бұл жерде мен осымен айналысамын және жұмысымды үлкен ықыласпен орындаймын. Бұл форум екі мәселені шешеді. Біріншісі, ол бір-бірімен және аудиториямен пікір алмасатын сарапшыларды тартады. Екіншісі, мен үшін бұл – алдағы уақытта бірге жұмыс істеуге болатын адамдармен байланыс орнату. Мысалы, біз «Startup Genome Ranking» өкілдерімен байланыс орнаттық. Олар бізге қазақстандық экожүйені жетілдіруге және сол арқылы олардың рейтингіндегі біздің позициямызды көтеруге көмектеседі, түрлі экожүйелер рейтингтерін құрастырады. Сондай-ақ, біз салық мектептерімен және басқа да компаниялармен сөйлестік, нарықтарды кеңейту бойынша форум өткізе аламыз. Сондықтан да мен осындай мүмкіндіктердің болғанына өте қуаныштымын», – деп түйіндеді Джозеф Циглер.

«Digital Bridge» форумы бағдарламасында 9 панельдік пікірталас сессиясы қамтылып, шақырылған спикерлер экожүйелердің тұрақты стартаптарын құру, мемлекетті цифрландыруда «Blockchain» технологиясын қолдану, электрондық үкіметтің дамуына жаңа ақпараттық технологиялардың әсері, ғарыштық инновациялар, Қазақстан технологиялық кәсіпкерлерінің жаңа келешегін қалыптастыру жолы мен инновациялық дамудың басқа да тақырыптарын талқылады.

Форум аясында ҚР Премьер-министрінің орынбасары Асқар Жұмағалиевтің төрағалық етуімен үш номинация бойынша жеңімпаздар анықталып, Қазақстандағы цифрландыру саласындағы ең алғашқы «Digital Bridge Awards» жүлдесін ҚР Денсаулық сақтау министрлігі жеңіп алды. Ресей Федерациясының байланыс және бұқаралық коммуникациялар министрі Константин Носков «Үздік цифрлық бастама» номинациясын ҚР Денсаулық сақтау министрі Елжан Біртановқа табыстады. «Цифрландыру жөнінде ең үздік кеңсе» номинациясын жеңіп алған «Оңай» компаниясын жүлдемен Эстония Премьер-министрі Юри Ратас марапаттады. «Үздік IT-компания» номинациясы бойынша жүлде «Documentolog» компаниясына бұйырды. Марапатты ҚР Премьер-министрі Бақытжан Сағынтаев табыс етті.

ТОБЫҚТАЙ ТҮЙІН

«Digital Bridge» форумы цифрлық трансформация, электрондық үкімет, технологиялық кәсіпкерлік және 4-ші өнеркәсіптік революция идеяларын ілгерілетуге арналған Еуропа мен Азия елдерінің арасындағы диалогтік алаңды құрайтын жыл сайынғы іс-шара болады деп көзделуде.

Жансая ШЫҢҒЫСХАНҚЫЗЫ, «Qazaq» газетінің Астана қаласындағы меншікті тілшісі

Жауап қалдырыңыз

Please enter your comment!
Please enter your name here