АЙ САЙЫНҒЫ ЖАЛҒА АЛУ ҚҰНЫ 10-12 МЫҢ ТЕҢГЕНІ ҚҰРАЙТЫН ПӘТЕРДІ КІМДЕР АЛАДЫ?

0
527

29  жасқа  дейінгі  жұмыс істейтін Нұр-Сұлтан, Алматы мен Шымкент қалаларының жастарына сатып алу құқығы қарастырылмаған жалдамалы пәтерді ұсыну тәртібі өз күшіне енді. Бұл туралы Орталық коммуникациялар қызметінде өткен баспасөз мәслихатында ҚР Ақпарат және қоғамдық даму министрлігі Жастар және отбасы істері комитетінің төрағасы Мадияр Қожахмет хабарлады.

Сонымен, бұл жалдамалы баспаналар Тұрғын үй-коммуналдық қорынан жалдап тұруы үшін 29 жасқа дейінгі ҚР азаматтарына ұсынылады. Ақысын төлеп тұратын жалдамалы баспана ҚР Үкіметінің 2018 жылғы 22 маусымдағы № 372 қаулысымен бекітілген «Нұрлы жер» мемлекеттік тұрғын үй бағдарламасында белгіленген талаптар бойынша жұмыс істейтін жастарға беріледі. Мұндай пәтерді алатын азаматтар балдық жүйеге сәйкес таңдалады. Ол сұранысқа ие 100 мамандықтың тізіміндегі біріне ие болса, оған қосымша 10 балл, отбасы болғаны үшін 5 балл, әр баласы үшін бір-бірден балл, одан соң жеке бизнесі болса, 5 балл қосымша алады. Уәкілетті орган он жұмыс күні ішінде осы негізде балл қойып, оны есептеп, сол бойынша жалдамалы пәтерден үміткер бола алатын азаматтардың тізімін жасайды.

Ең бірінші кезекте жалдамалы баспана жас отбасыларға (29 жасқа дейінгі), одан соң нарықтағы сұранысқа ие 100 мамандықтың бірінің иесіне, жас кәсіпкерлерге, бюджеттік ұйымдардың қызметкерлеріне беріледі.

Өтінішпен бірге ұсынылуы қажет құжаттар тізімі: жеке куәліктің көшірмесі, білімі туралы құжат, неке куәлігі (егер бар болса), балалардың туу туралы куәлігі (болған жағдайда). Сондай-ақ, өтініш берушінің өзінің және отбасы мүшелері атына ешқандай жылжымайтын мүлік тіркелмегені жөнінде анықтама, жұмыс орнынан анықтама, айлық табыстары 40 АЕК-тен (шамамен 100 мың теңгеден) аспайтынын растайтын соңғы алты айдағы кірісі туралы анықтама, еңбек өтілі туралы құжаттар, банктік шотты және шоттағы ақша қалдығы туралы есеп, жеке жетістіктері туралы құжаттар (болған жағдайда) қажет.

Пәтерді ай сайынғы  жалға  алу  құны 10-12 мың   теңгені   құрайды.  Оған  қоса  жастар  5 жылдан соң жалдамалы баспананы босатуы тиіс болады.

Бағдарлама бойынша биыл Нұр-Сұлтанда – 1 050 пәтер, Алматыда – 1 050 пәтер, Шымкентте – 904 пәтер жалға беріледі.

Жауап қалдырыңыз

Please enter your comment!
Please enter your name here