АБУ-ДАБИ: РЕКОРДТАР МЕН МИЛЛИОНЕРЛЕР ҚАЛАСЫ

0
235

Біріккен Араб Әмірліктерінің астанасы Абу-Дабиді көрмекке жыл сайын әлемнің түкпір-түкпірінен миллиондаған туристер ағылады екен. Өткен жылдың өзінде оған 10 миллионнан астам шетелдік келген. Олардың көпшілігі – Үндістан, АҚШ және Қытай азаматтары. Ең ірі және ең бай елге қызығушылық бұрынғы Кеңес Одағы елдерінен келген саяхатшылар арасында да байқалған. Сонымен, Абу-Даби қаласының Мәдениет және туризм бөлімінің мәліметі бойынша, былтыр БАӘ астанасында 56,5 мың ресейлік, 16,0 мың украиндық және 8,5 мың қазақстандық демалған. 2017 жылмен салыстырғанда қазақстандық туристер саны 64 пайызға артқан.

ТАЯУ ШЫҒЫСТАҒЫ МАНХЭТТЕН

Шетелдік туристердің әлемдегі ең сәнді қалалардың біріне жетуге ынтығатыны кездейсоқ емес.

Біріншіден, керемет қонақ үйлер, ақ түсті жағажайлар, әсем пейзаждар мен ерекше сәулет туындылары Абу-Дабиді басқа қалалардан ерекшелендіреді. Оған қоса, көп қабатты ғимараттар мен кәсіпкерлер шоғырланғандықтан бұл мегаполис «Таяу Шығыстағы Манхэттен», ал жасыл желектің көптігі үшін «Бақша қаласы» деп аталып кеткен.

Екіншіден, қазақстандықтар жақсы көретін Абу-Дабиде басқа қаладағыдай кептеліс пен әбігерлік жоқ. Жанға жайлы қалада саяхатшылардың демалыстары тыныш әрі жақсы өтеді. Бұл іскер саяхатшылар, балалары бар жұптар және жағажай әуесқойлары үшін өте қолайлы. Сонымен қатар, жергілікті жағажайлар әлемдегі мұнтаздай таза жағажайлар тізіміне енген. Олардың көпшілігі «Көгілдір жалау» халықаралық сапа белгісімен белгіленген. Осылайша, жылдың кез келген уақытында Абу-Дабиде жақсылап демалуға болады.

Туристердің белсенділігі қыркүйектен қарашаға және наурыздан мамырға дейінгі кезеңде байқалғанымен, бұл маусымнан басқа уақытта да демалысты көңілді өткізуге мүмкіндік бар. Мәселен, қыста жаңа жылды арабтардың қонақжайлылығымен мерекелік көңіл-күйде қарсы алуға болады. Ал, жазда тиімді сауда жасауға мүмкіндік мол.

КӨРІКТІ ЖЕРЛЕР КӨЗ ҚЫЗЫҚТЫРАДЫ

Ғажайып зәулім сарайлар, көк тіреген үйлер және талғам мен қалта көтеретін орындардың сан түрі. Біріккен Араб Әмірліктерінің астанасын туристер осылай сипаттайды. Әмірліктің басты туристік аймағы және тақырыптық парктердің рекордтық  деңгейдегі  ең  көп  шоғыры – жасанды Яс аралы. Бұл – Абу-Дабиден арнайы  қазылған кең арналар арқылы  бөлінген құрлықтағы жер бөлігі.  Аралдың жалпы ауданы – 2,5 мың гектар, жағалау ұзындығы – 32 км. Бүгінде мұнда Yas Marina Circuit тас жолы орналасқан. 2009 жылдан бері «Формула-1» бас жүлдесі  өткізіліп, Ferrari World ойын-сауық паркі, Yas Water World аквапаркі және Warner Bros World аттракциондар паркі жұмыс істейді.  Бұл әлемдегі ең үлкен жабық тақырыптық парктердің бірі. Оның ауданы – 86 мың шаршы метр. Парктің бір ерекшелігі – Ferrari логотипі жазылған ашық қызыл түсті шатырының болуы.

Айта кетсек, парктегі барлық ойын-сауық орындары италияндық брендпен міндетті түрде астасып жатады. Ferrari World шартты түрде екі бөлікке бөлінген: мұражайлық және аттракциондар аймағы.

Galleria Ferrari мұражайы – әлем бойынша Маранеллодан (Италиядағы қала) кейін көлемі жағынан екінші орын алатын Ferrari автомобиль көрмесі. Бірақ, мұнда экспонаттардың көп бөлігі жеке коллекционерлерге тиесілі, бұл таңқалатын дүние емес, себебі Абу-Даби Ferrari-дің жан басына шаққандағы саны жағынан рекордсмен.

Паркте 20-дан астам аттракцион бар, олардың қай-қайсысы да адамдарды таңқалдырмай қоймайды. Мәселен, Ferrari World ойын-сауық бағдарламасының хиті – әлемдегі ең жылдам пневматикалық американдық   «Формула Росса» төбешігі. Тректің ұзындығы – 2 мың метр. Парктің тағы бір мақтанышы – «Ұшатын нағыз шеберлер». Бұл төбешіктің 52 метрлік рекордтық деңгейдегі «өлі ілмегі», жылдамдығы 120 км/с дейінгі тік бастапқы құламасы бар. Осы  екі аттракцион да экстремалды болып саналатынын, ал олардың тас жолы жабық парктің сыртында орналасқанын айта кету керек. Қолайсыз ауа райы жағдайы мен қатты жел тұрғанда Ferrari World әкімшілігі оларды  жабады.

Балалар үшін паркте «Неllо – қызықтар елі», «Таңғажайып Италия», «Бенно үлкен жарысы», «Айналма дөңгелек», Junoir GT автомектебі, «Балалар жаттықтыру лагері» ойын алаңдары бар. Балалар билетінің құны – 53$, ересектерге – 80$. Парк күн сайын таңертең 11:00-ден кешкі 20:00-ге дейін жұмыс істейді.

АСТАНАНЫҢ ЕРЕКШЕЛІКТЕРІ

Яс аралында көру міндетті саналатын келесі локация – ауданы 15 гектар Yas WaterWorld аквапаркі. Бұл БАӘ-дегі ең бір қызықты аквапарктердің бірі. Тұжырымдаманың негізінде жоғалған інжу моншақты іздеп жолға шыққан ауыл қызы туралы аңыз жатыр. Келушілер бір аттракционнан екіншісіне өте отырып, осы оқиғадағы жас іздеуші қыздың жүрген жолдарын қайталағандай болады. Аквапарк аумағында барлығы 43 аттракцион бар. Оның үстіне олардың бірқатары бірегей және әлемде баламасы жоқ.  Мәселен, Hairat Yas – тереңдігі 5 метрлік арнайы бассейн, оған тәжірибелі нұсқаушымен бірге кез келген тілек білдірген адам суға түсе алады және інжу моншағы бар бақалшықты алып, қосымша ақыға содан шағын әшекей бұйым жасай алады.

Аквапаркке кіру құны бойы 1,1 метрден төмен балалар үшін – 57$, ересектер үшін – 68$. Келушілерге билетпен бірге су өтпейтін білезіктер беріледі. Бұл білезіктер тек зат сақтайтын жәшіктің кілті ретінде ғана емес, дебет картасы ретінде де қолданылады. Білезікпен тамақ, сусын, балмұздақ және қосымша қызметтер бойынша төлем жасауға болады. 

БАӘ астанасында тек көңіл көтеріп қана қоймай, рухани да азық алуға болады. 2017 жылы қарашада Саадият аралында «Лувр Абу-Даби» ашылды. Мұражай кешені жабық өту жолдарымен байланысқан 55 ақ павильоннан тұрады. Ғимарат  ауданы – 24 мың ш.м. Мұражайда 12 галерея мен 600 экспонат бар. Бұлар түрлі  дәуірлер мен елдерді, мәдениеттер мен өркениеттерді біріктіруші өнер туындылары. Мұнда іс жүзінде жердің барлық түпкірінен экспонаттар бар.

Абу-Дабиға келіп тұрып, екі мәрте Гиннес рекордтар кітабына енген шейх Заид  мешітіне бас сұқпай кету кез келген саяхатшыға сын.

Шейх Заид – әлемдегі үшінші үлкен мешіт. Мешіттің  атауы – БАӘ-нің негізін қалаушы шейх Заид ибн Сұлтанның құрметіне берілген. Мешіттің құлшылық жасалатын залына әлемдегі ең үлкен кілем төселген. Қолөнердің бұл озық үлгісі 5 627 шаршы метрлік көлемге арналып жасалған және салмағы 45 тоннаны құрайды. Құны 6 миллион долларды құрайтын кілемді екі бірдей ұшақпен әкелген. Мұнда бір мезгілде 40 мың адам құлшылық жасай алады. Мешітке діни көзқарастарына қарамастан кез келген адам бара алады. Бірақ, киімге  қатал қарайды, сыртқы киім жабық және кең тігілген болуы керек. Мешітке кіру тегін. Экскурсиялар күн сайын сағат 09:00-ден 21:30-ға дейін, жұма күндері тек түстен кейін жүргізіледі.

ТОБЫҚТАЙ ТҮЙІН

Айналдырған бір-екі күнде барлық көрікті жерлерін аралау мүмкін емес. Алайда, турист сапарды алдын ала жоспарласа, демалысы қызықты әрі жақсы өтпек. Ендеше, Абу-Дабидің ашылмаған сырын әр саяхатшының еркіне қалдырдық.

ЖАНСАЯ ШЫҢҒЫСХАН, «QAZAQ» ГАЗЕТІНІҢ ШОЛУШЫСЫ

Жауап қалдырыңыз

Please enter your comment!
Please enter your name here