ПСИХОЛОГИЯЛЫҚ ҚЫЗМЕТ САПАСЫН КҮШЕЙТУ – ҚАУІПСІЗ БІЛІМ БЕРУ ОРТАСЫН ҚАЛЫПТАСТЫРУДЫҢ БАСТЫ ШАРТЫ

0
492

Мемлекет басшысы Қасым-Жомарт Тоқаевтың  2019 жылғы 2 қыркүйектегі «Сындарлы қоғамдық диалог – Қазақстанның тұрақтылығы мен өркендеуінің негізі» атты Қазақстан халқына Жолдауында жасөспірімдер арасындағы суицид мәселесін шешумен жүйелі айналысуды тапсырып, бала құқығын қорғау жұмыстарына ерекше назар аудару керектігіне тоқталды.

Осы орайда оқу процесінде қауіпсіздікті қамтамасыз ету мақсатында өңірімізде мектеп психологтарының жұмысын күшейту Қызылорда облысы Білім басқармасы қызметінің басым бағыты ретінде айқындалған. Қазір облыста 470 педагог-психолог жұмыс жасайды. Соңғы бес жылды алып қарасақ, өңірімізде жасөспірімдермен күнделікті жұмыс жүргізетін психологтардың кәсіби деңгейін арттыруға ерекше назар аударылып, тиісті оқыту-ұйымдастыру іс-шаралары тұрақты түрде жүргізіліп келеді.

Мәселен, 2015-2016 оқу жылында «Кәмелетке толмағандар арасындағы суицид превенциясы» пилоттық жобасы аясында өңірдегі барлық педагог-психолог өз кәсіби біліктілігін арттырды. Ал 2017 жылы Білім басқармасы «Bilim Foundation» қоғамдық қорымен бірлесіп, «Жасөспірімдердің денсаулығы мен өмірлік дағдыларын қалыптастыру және суицидтің алдын алу» бағдарламасы аясында жергілікті педагог-психологтардың біліктілігін арттыруға мүмкіндік жасады. 2018 жылы аталған бағдарламаның келесі кезеңінде облыстың 805 педагог-психологы мен өзін-өзі тану пәнінің мұғалімдері «Денсаулық және өмірлік дағдыларды қалыптастыру» бағыты бойынша арнайы оқу курсынан өтті.

Биыл «Ата-анаға бала жүйесінде психологиялық консультация жүргізу» тақырыбында педагог-психологтарға арналған біліктілікті арттыру курсында 456 педагог-психолог дайындықтан өтті. Сондай-ақ, Білім басқармасы жанындағы облыстық оқу орталығы (әдістемелік кабинет) мен «Bilim Foundation» қоғамдық қорының қызметкерлері бірлесе облыс бойынша білім беру ұйымдарының басшыларына, директорлардың тәрбие ісі жөніндегі орынбасарларына суицидтің алдын алу бағыты бойынша арнайы оқыту семинарлары мен педагог-психологтарға арналған дөңгелек үстелдер ұйымдастырды. Нақты айтсақ, 207 директор, 282 мектеп директорының тәрбие ісі жөніндегі орынбасары және 439 педагог-психолог аталған іс-шараларға белсене қатысты.

Оқу семинарларының мазмұнына тоқталсақ, курс барысында білім ордаларындағы басқарушы қызметкерлер және ата-аналармен тығыз жұмыс істейтін педагог-психологтармен бірге суицидке итермелеуші факторлар жайлы, әсіресе, әлімжеттік (буллинг), перфекционизм, үрей, стресс, депрессия, кибербуллинг секілді мәселелер егжей-тегжейлі талқыланды. Аталған мәселелер ғылыми тұрғыдан қарапайым тілде түсіндіріліп, оларды практикалық тұрғыдан шешу жолдары қарастырылды. Ол жолдардың мазмұны бірнеше арнайы көркем және анимациялық жанрдағы бейнероликтерде көрсетілді. Ата-аналар және осы салаға қатысты мамандар ол роликтерді zhastar.org сайтында оқушыларға арналған бөлімінен және облыстық білім беру басқармасы, «Bilim Foundation» қоғамдық қорының әлеуметтік желілерінен таныса алады. Басты мақсат – баланың айналасындағы ересектердің жасөспірімдердің психикалық саулығына әсер ететін проблемалар жайлы хабардарлығын мейлінше арттыру, оларды қажет кезде балаға көмек қолын созуға дайын болуға шақыру.

Облыста Білім басқармасының ұйытқы болуымен біліктілік арттыру курстарымен қатар, тақырыптық семинарлар аясында да тәжірибе алмасу мен тақырыптық түсіндірме жұмыстары тұрақты дәстүрге айналған.

Атап айтқанда, «Педагогтардың кәсіби эмоционалдық құлдырау синдромының алдын алу», «Жантану» психологиялық клубын жүргізу, «Агрессияның жеңіл өту жолдары», «Оқытушылардың психикалық саулығы – мақсатқа жетудің негізгі жолы», «Оқытушының кәсіби эмоциялық күйгелектену себептері және оның психикалық алдын алу», «Тұлғааралық қарым-қатынаста жетістікке жету жолдары» және т.б. тақырыптар бойынша әдістемелік көмек көр-сетілуде.

Сонымен қатар, облыс көлеміндегі педагог-психологтарды тұрақты түрде әдістемелік қолдау мақсатында Қорқыт Ата атындағы Қызылорда мемлекеттік университеті ғалымдарымен бірлесіп, желгілікті «Qyzylorda» телеарнасы арқылы «Психолог сағаты» айдарымен бейнесабақтар топтамасы тұрақты көрсетіледі.

Көріп отырғанымыздай, арнайы оқу семинарлары, уоркшоптар, тақырыптық дайындық курстары және БАҚ мүмкіндіктерін қолдану арқылы облыстағы білім беру ұйымдарындағы педагог-психологтардың кәсіби деңгейін кезең-кезеңімен жүйелі түрде арттыру жұмыстары іске асуда.

Атқарылған жұмыстардың нәтижесі ретінде өңіріміздегі педагог-психологтардың рес-публикалық деңгейдегі байқауларда үздік көрсеткіштерге қол жеткізуін атап өтуге болады. Мысалы, 2018 жылы ҚР Білім және ғылым министрлігінің «Дарын» республикалық ғылыми-практикалық орталығының ұйымдастыруымен өткен «Үздік психолог» республикалық байқауында Қызылорда облысының педагог-психологтары екі жүлделі орынға ие болса, 2019 жылы  Қармақшы ауданындағы №279 орта мектептің педагог-психологы Медеуова Эльмира І-орынды, Қызылорда қаласының №144 орта мектептің  педагог-психологы  Сейтханова Бахыткүл ІІІ-орынға лайықты деп танылса, Шиелі ауданындағы №47 орта мектептің    педагог-психологы Шағдарова Айнұр «Үздік партфолио» номинациясын жеңіп алды.

Алдағы оқу жылдарында балалар мен жасөспірімдердің физикалық және психикалық саулығын күшейту мақсатында және Президент Қасым-Жомарт Тоқаевтың қауіпсіз оқу ортасын қалыптастыру туралы тапсырмасын жүзеге асыру барысында Білім басқармасы жүйелі жұмыстар дәстүрін жалғастыра беретін болады.

Сырым Асқаров, Қызылорда облыстық Оқу орталығының директоры

Жауап қалдырыңыз

Please enter your comment!
Please enter your name here