25 мамырдан бастап барлық ХҚО мен дәмханалар ашылады

0
566

Екі млн халқы бар Алматы қаласында 25 мамырдан бастап барлық дәмхана, мейрамхана, ХҚО-лар ашылады. Бұл туралы Алматы қалалық Кәсіпкерлік және инвестициялар басқармасы басшысының орынбасары Қанат Сағындықов айтты.

«18 мамырдан бастап туризм, ұялы байланыстың абоненттік бөлімдері, банк бөлімшелері, қаржы секторы толық ашылды. 25 мамырдан бастап карантин режимін босаңсыту аясында қаладағы барлық сауда үйлерін, сауда, ойын-сауық орталықтарын ашуды жоспарлап отырмыз. Қалада осындай 140 нысан бар екен. Сонымен қатар, мейрамхана, дәмханалар да ашылады», – деп түсіндірді басқарма басшысының орынбасары.

Қанат Сағындықовтың айтуынша, мұндай мекемелерде келушілердің санына қатысты шектеу жоқ.

«Ең бастысы – санитарлық талаптар толық орындалуы тиіс. Үстелдердің арасы 2 метрден кем болмауы керек. Бір үстелге бір отбасының 4 адамы ғана отырғаны абзал. Қоғамдық тамақтану орындары 23:00-ге дейін ғана ашық тұрады. Бірақ, банкет, той жасауға тыйым салынады. Сондай-ақ, Алматыда осы уақытқа дейін санитарлық талаптарға сай келмеген соң жабық тұрған азық-түлік базарлары да ашылады. Бұл ашық типтегі базарларда түсіндіру жұмыстары жүргізілді. Сенбі күні аудит болады. Одан бөлек қаладағы барлық қонақ үйлер, ХҚО ашылады», – деді басқарма басшысының орынбасары.

Аудит ауданы 500 шаршы метрден асатын нысандарда ғана жүргізіледі. Ал, бірінші кезеңде сауда, ойын-сауық орталықтарында бутиктер, мейрамханалар, химтазалау ашылады. Екінші кезеңде – қоғамдық тамақтану орындары, яғни фудкорт, үшінші кезеңде – кинотеатрлар, ойын-сауық алаңдары ашылады.

Жауап қалдырыңыз

Please enter your comment!
Please enter your name here