Сенатор Мақтаарал ауданын қалпына келтіру жұмыстарының барысымен танысты

0
166

Өңірге жасаған сапарында Парламент Сенатының депутаты Әлімжан Құртаев ҚР Индустрия және инфрақұрылымдық даму бірінші вице-министрі Қайырбек Өскенбаевпен бірге Мақтаарал ауданының Өргебас, Фирдоуси елдімекендеріндегі қалпына келтіру жұмыстарымен, сондай-ақ Мырзакент ықшамауданының құрылысымен танысты. Бұл туралы ҚР Парламенті Сенатының Баспасөз қызметі хабарлады.

2020 жылдың мамыр айында Өзбекстандағы Сардоба су қоймасы жарылып, Орталық коллекторда судың толуына себепші болды, нәтижесінде Түркістан облысы Мақтаарал ауданының аумағын су шайып кеткен болатын. Бес елдімекенді су басып қалды.

Әлімжан Құртаев жауапты мемлекеттік органдардың, құрылыс ұйымдарының өкілдерімен және азаматтармен кездесті. Оған Мырзакент кентінде 1200 орындық мектептің, 280 орындық балабақшаның және дәрігерлік амбулаторияның құрылысы туралы айтылды. Фирдоусиде жұмысшылар 600 орындық мектепті қалпына келтіруде, жаңадан дәрігерлік амбулатория мен бекініс пунктін салуда. 

Мырзакент шағынауданында 386 тұрғын үй құрылысына мың жарымға жуық адам қатысуда. Аудан әкімдігі 196 тұрғын үйдің Үкімет қорының есебінен және 190 үй қайырымдылық қорларының, оның ішінде «Біз біргеміз» қорының есебінен салынып жатқанын айтты. 

Сонымен қатар, су басудан зардап шеккен ауылдарда газ, жарық жүйелері, байланыс желілері мен автокөлік жолдары қалпына келтірілуде.

Түркістан облысына сапары аясында Әлімжан Құртаев өңір жұртшылығымен кездесулер өткізуде, жауапты мемлекеттік органдарының өкілдерімен бірлесіп медициналық мекемелерге барып, жергілікті жерде пандемиямен күрес жұмыстарының барысымен танысуда.

Жауап қалдырыңыз

Please enter your comment!
Please enter your name here