Қазақстан Республикасы Президенті жанындағы Орталық коммуникациялар қызметінде өткен брифингте Қорғаныс министрінің орынбасары генерал-лейтенант Сұлтан Қамалетдинов Қарулы күштер қызметінің қорытындылары туралы айтты.
Әскери ведомство өкілі «Орын алған қиындықтарға қарамастан, Қорғаныс министрлігінің алдына қойылған міндеттер толықтай орындалғанын атап өтті. Бірінші кезекте күш-жігер әскерлердің жауынгерлік әзірлігін арттыруға, жоғары технологиялық қару-жарақ үлгілерімен жарақтандыруға, цифрлық технологияларды енгізуге бағытталды» деді.
2022 жылғы негізгі оқиғалар мен жетістіктер жайында генерал-лейтенант Сұлтан Қамалетдинов:
– «Батыл тойтарыс-2022», «Бекет-2022» оқу-жаттығуларында күштік құрылымдардың өзара іс-қимылы мен бірыңғай қолбасшылықтағы әскерлердің көпведомстволық топтарын қолдану мәселелері пысықталды. Арнайы операциялар күштерінің қолбасшылығы құрылды. Десанттық-шабуылдау әскерлері дербес әскер тегіне айналды. 34 елдің әскери қызметшілері қатысқан халықаралық армия ойындарында Қазақстан жалпы рейтингте үшінші орынға ие болды, – деп атап өтті.
«Айбалта-2022» стратегиялық командалық-штабтық оқу-жаттығулары шеңберінде ҰҚШҰ әскери контингенттерімен «Эшелон», «Іздеу», «Өзара іс-қимыл» сынды кең көлемді халықаралық оқу-жаттығулары өтті.
Әскерлерді озық қару-жарақпен және басқару жүйелерімен жарақтандыру жұмыстары жоспарлы түрде жалғасуда. Биыл әскерлерге жүзден астам әскери техника келіп түсті. Бұл ретте Қарулы күштердің мемлекеттік қорғаныс тапсырысы көлемінің жартысынан көбін отандық қорғаныс-өнеркәсіп кешені кәсіпорындары қамтамасыз етеді. Олардың әскери техниканы жөндеумен және қызмет көрсетумен де айналысатынын атап өту керек.
«Қауіпсіз ел» ұлттық жобасын іске асыру шеңберінде оқ-дәрі қоймаларын, әскери қоймаларды салу, оларды жетілдіру мен қажетті жабдықтармен жарақтандыру жүзеге асырылды. Әскери қызметшілердің өмірі мен денсаулығын сақтауға және қайтарымсыз шығындарды азайтуға бағытталған 2022 жылы қабылданып, қолданысқа енген «Өміріңді САҚТА» бағдарламасы оң нәтиже берді. Қабылданған шаралар қайтарымсыз шығындарды, оның ішінде мерзімді қызметтегі әскери қызметшілер мен курсанттар арасында 21%-ке төмендетуге қол жеткізді.
Әскери қызметшілерге еңбекақы төлеу мен әлеуметтік қамсыздандыру жүйесін жақсартуға арналған жұмыстар жүргізілуде. Президент тапсырмасына сәйкес, 2021 жылдан бастап жеке құрамның ақшалай үлесін жоспарлы түрде арттыру жүргізіліп келеді. 2023 жылы лауазымдық жалақының жалпы өсуі 2020 жылғы мөлшердің 60% құрайды.
Әскери қызметтің тартымдылығын арттыру мақсатымен еліміздің
45 жетекші жоғары оқу орнының ректорларымен мерзімді әскери қызмет өткергендерге жоғары оқу орындарына түсуге жеңілдіктер беру туралы меморандумға қол қойылды.
ҚР Қаржы нарығын реттеу және дамыту агенттігімен әскери қызметшілерге мерзімді әскери қызмет өткеру кезеңінде «кредиттік каникул» беру туралы меморандум жасалды.
Қарулы күштерде әскери қызметшілер мен өскелең ұрпақты әскери-патриоттық тәрбиелеуге ерекше көңіл бөлінеді. Бүгінде елімізде «Жас сарбаз» балалар-жасөспірімдер қозғалысы сапында 260 мыңнан астам бала мен жасөспірім тәрбиеленіп жатыр.
– 2023 жылы Қорғаныс министрлігінің күш-жігері жауынгерлік және жұмылдыру дайындығын қолдауға, әскерлердің жауынгерлік мүмкіндіктерін арттыруға, басқару органдары мен құрамалардың, бөлімдер мен бөлімшелердің үйлесімділігін арттыруға бағытталатын болады, – деді.
Кездесу соңында Қорғаныс министрінің орынбасары БАҚ өкілдерінің сұрақтарына жауап берді.
ҚР Қорғаныс министрлігінің Баспасөз қызметі
