Ел тізгінін ұстауға лайық тұлға айқын жеңіске жетті

0
2020

9 маусым күні отандастарымыз өз таңдауын жасап, жеті үміткердің арасынан Қасым-Жомарт Тоқаевқа тоқтады. Сөйтіп, ел тізгінін ұстауға лайық тұлға айқын жеңіске жетті. Бұл халықтың бірден-бір дұрыс таңдауы деп санаймыз. Қасым-Жомарт Кемелұлы басқару саласында тәжірибесі мол, әлемге танылған дипломат. Мемлекет тізгінін қолына алғаннан бергі уақыттағы бастамалары да көңілге қуаныш ұялатады.

Қасым-Жомарт Тоқаевтың дипломатиялық өсу жолы 1974 жылы Қытай Халық Республикасында басталды. ҚХР-дағы КСРО Елшілігінде тағылымдамасы аяқталып, институтта диплом қорғағаннан кейін Сингапур Республикасындағы КСРО Елшілігіне қызметке жіберіліп, онда төрт жыл абыройлы қызмет етті. Одан әрі КСРО СІМ-нің Орталық аппаратында кеңестік тағылымдамадан өтушілер тобына жетекшілік жасады. 1985-1991 жылдар аралығында ҚХР-дағы КСРО Елшілігінде қызметте болды.
Қазақстанның Тұңғыш Президенті – Елбасы Нұрсұлтан Назарбаев сол бір тәуелсіздік алар тұстағы тұманы мен күмәні қалың кезеңде де елінің қамын жеген тұлғаның бірі, дәлірек айтқанда, кеңестік дәуірдегі сирек бітімді қайраткер басшылардың бірегейі Қасым-Жомарт Тоқаевқа үміт артып, сыртқы саясаттағы жауапты жұмыстарды сеніп тапсырды. Ол әдеттегі сабырлы қалыбынан жаңылмай, аспай-саспай жүріп, пешенесіне бұйырған қызметте биіктен көріне білді. Елбасының да, халықтың да сенімін ақтады. Қазақстанның қазіргі сыртқы саясатының негізін қалады. Халықаралық аренада Қазақстанның ұлттық мүдделерін қайсар мінезімен қорғайтын кәсіби дипломат, беделді тұлға ретінде танылды. «Qazaq» газетінің сәуір айындағы бір санында «Ел тізгінін ұстауға лайық қайраткер» деп жазғанымыз да сондықтан.
Рас, Қасым-Жомарт Тоқаевтың өмірбаяны саяси жорамал тұрғысынан алғанда кез келген саяси қайраткер үшін мінсіз деп айтуға толықтай негіз бар. Мемлекет тізгінін қолына ұстаған осы екі айдың ішінде тәуелсіз Қазақстанның екінші Президенті біраз істерді атқарып та үлгерді. Яғни, мемлекет басқара алатын қайраткер ретінде өзін көрсете білді.
Тұла бойы тұнған зиялылық, ұстамдылық пен ұжданға бай, кісілік пен кішіліктің эталоны іспеттес қалыбымен сақталған Қасым-Жомарт Кемелұлының ел тізгінін ұстауын мемлекет және қоғам қайраткері Махмұт Нәлібаев басқаратын ұйымшыл ұжым да қазақстандықтармен бірге қуана құп көреді. Сондықтан Махмұт Ыбырайханұлы басқаратын компаниялар тобының, Кеңес Одағының Батыры, Халық Қаһарманы, Қазақстанның тұңғыш қорғаныс министрі Сағадат Нұрмағамбетов атындағы Халықаралық патриоттық қоғамдық Қорының және «Qazaq» газетінің ұжымдары сайлау алдында Қасым-Жомарт Тоқаевты қолдаған үгіт-насихат жұмыстарына бір кісідей атсалысып, бірауыздан өз еріктерімен лайықты үміткерге дауыс берді. Дәл қазіргідей елдік мұраттар, ұлттық ұстын, халықтық қалып сынға түсіп тұрған кезеңде, сыртқы күштердің әсерімен жалау ұстаған жалған ұраншылар бұқараның қолтығына су бүркіп, ұлт ойы мен санасын «ары итеріп, бері жығып» жататын сәттерде ел-жұртқа дұрыс жол сілтеп, болашақты болжай отырып, қажет кезінде қалың қауымға дұрыс бағыт-бағдар беретін көшбасшы сайланғанына қуандық. Тәуелсіз мемлекетіміздің тағдырлы міндетін мойнына алған Қасым-Жомарт Кемелұлы Тоқаевтың бұл міндетті абыроймен атқарып, ел үміті мен сеніміне ие боларына бек сенеміз. Сәрсенбі күні Қасым-Жомарт Кемелұлы өзіне сенім артқан халқы алдында адал қызмет етуге ант қабылдап, сайлауалды ұсынған бағдарламасында айтылған ел игілігі жолындағы маңызды міндеттерді жүзеге асыруға серт етті. Ендеше, Президенттің өнімді жұмыс жасауына мүмкіндік беріп, қолдау білдірейік, ағайын!
Ал біз Қасым-Жомарт Кемелұлының барлық бастамалары мен мемлекеттік бағдарламаларын жүзеге асыру жолында еңбек ететінімізді хабарлаймыз. Бұған дейін де қыруар шаруалар атқарылды. Атап айтқанда, Махмұт Ыбырайханұлының басқаруымен бірнеше жаңа жобалар қолға алынып, қазіргі таңда кен орындарын ұйымдастыру жұмыстары жүргізіліп, жаңа жұмыс орындары ашылуда. Соңғы 10 жылдықтың ішінде Махмұт Нәлібаев басқаратын компаниялар 135 млн АҚШ доллары көлемінде шетелдік инвестиция тартты. Сонымен қатар, елдің әлеуметтік саласына да баса назар аударылып келеді. Мәселен, «Денсаулық» мемлекеттік бағдарламасын қолдау мақсатында 90 млн теңгеден астам қаржы Қызылорда облыстық медициналық орталығына (ОМО) бөлінді. Сол қаржылай көмек ОМО-ның материалдық-техникалық базасын жақсартты. Оқу-әдістемелік орталығы ашылып, жабдықталды. Бүгінде бұл орталықта облыстың ондаған мың дәрігері мен орта медицина қызметкері біліктілікті арттыру курс-тарынан, оқу тренингтерінен өтті. Заманауи компьютерлік-диагностикалық құрылғымен, кеңсе техникасымен, қант диабетінің жасырын ағымын анықтайтын талдағышпен және жиһазбен жабдықталған Автоматтандырыл-ған басқару жүйесінің орталығы енгізілді. Жүздеген емделушінің өмірін ұзартатын итальяндық «Formula» атты 5 гемодиализдік жасанды бүйрек аппараты сатып алынды. Гемодиализ, балалар сынды бөлімдерді таза ауыз сумен тоқтаусыз қамтамасыз ету мақсатында ұңғымадан ОМО-ға дейінгі бір шақырымды құрайтын су таратқыш іске қосылды, ішкі су құбырының желісі күрделі жөндеуден өткізілді. Құны 4 млн АҚШ доллары тұратын ҚР Денсаулық сақтау министрлігінің магнитті-резонансты томограф (МРТ) пен компьютерлік томографты (КТ) орналастыру үшін екі мамандандырылған ғимарат тұрғызылды.
Сонымен қатар, білім саласының мекемелеріне 22 млн теңге бөлініп, №11 Шиелі индустриалды-аграрлық колледжінің материалды-техникалық базасы жақсартылды (компьютер, қызметтік автобус сатып алынды, шеберхана ашылды, жатақханаға күрделі жөндеу жүргізілді). Мұндай көмек Қызылорда қаласындағы №22 кәсіптік колледжге де көрсетілді. Жылда ата-ана қамқорлығынсыз қалған жетімдер, балалар үйі мен мектеп-интернат тәрбиеленушілері мектеп формасы және киім-кешекпен қамтамасыз етіліп келеді.
Қызылорда облысындағы Қорқыт ата мемориалдық кешенінің инфрақұрылымын дамыту мақсатында мешіт, қонақ үй, автотұрақ сынды әлеуметтік нысандардың салынуына демеушілік етті.
Кеңес Одағының Батыры, Халық Қаһарманы, Тәуелсіз Қазақстанның тұңғыш Қорғаныс министрі Сағадат Нұрмағамбетов атындағы Халықаралық патриоттық қайырымдылық Қорының да атқарып жүрген шаруасы толайым. Бұл – Халық Қаһарманының көзі тірісінде рұқсатын алып, құрылған қор болатын. Қоғамдық қор осы сегіз жыл ішінде біраз игі істердің ұйытқысы болды, соның ішінде Қажымұқан Мұңайтпасұлының (Ақмола облысы), Қобыланды батырдың (Қостанай қаласы), Сағадат Нұрмағамбетовтың (Мәскеу) еңселі ескерткіштерінің ашылуына демеушілік көрсетті. Қордың қаржыландыруымен «Ұлт мақтанышы – Сағадат Нұрмағамбетов» атты арнайы фотоальбом, «Ұлт тұлғасы – Мұстафа Шоқай» атты кітабын үш тілде, «Мұстафа Шоқай көзімен» атты шығармашылық туындылары бес тілде шығарылса, сондай-ақ «Елбасының сыныптастары», «Аталардың ақылы, даналардың нақылы» атты энциклопедиясы, Ақжігіт Әлібекұлының «Мәмлүктер билігі кезіндегі түркі-қыпшақ әдебиеті», «Казахстан – родина строй отряда», Оразбек Сәрсенбайұлының «Азаттық құрбандары», Құдайберген Сұлтанбаевқа арналған және тағы басқа да кітаптар көпшілікке ұсынылды. Сағадат Қожахметұлының 95 жылдығына арналған Республика көлеміндегі шаралардың басы-қасында Махмұт Ыбырайханұлы бастаған Батыр атындағы Қордың өкілдері жүрді, бір кісідей атсалысты. Ескерткіштердің ашылып, көшеге есімдерінің берілуіне ұйытқы болды. Бір айта кетерлігі, ұлттық дәстүрді сақтау, жастарға патриоттық тәрбие беру, шет елдегі қазақ диаспораларымен қарым-қатынасты жандандыру мақсатында құрылған Қор бұл күндері сол бағыттарда өнімді еңбек етіп, бұл мақсаттарға Махмұт Нәлібаев және Қордың белсенділері 700 млн теңгеден астам қаражат жұмсап, еліміздің барлық өңірлерінде қайырымдылық патриоттық жұмыстардың сапалы жасалуына тікелей ықпал етті. Сөйтіп, Елбасының «Рухани жаңғыру» бағдарламасына да өзіндік үлесін қосып келеді.
Жалпы, Махмұт Ыбырайханұлының басқаруындағы ұжым осы кезге дейін біраз шаруаны тындырды. Оның бәрін айту бізге мақсат та емес.
Айтайын дегеніміз, Қасым-Жомарт Тоқаев сәрсенбі күні он негізгі бағытты белгілеп берді және олардың бәрін жүзеге асыруға дереу іске кірісу керектігін баса айтты. Атап айтқанда, халықтың табысын арттыру және әл-ауқатын жақсарту, сыбайлас-жемқорлыққа қарсы тиімді іс-қимылдар жасау, соттық-құқықтық реформа, әділетті әлеуметтік саясат, тұрғын үй мәселесін шешу, өңірлерді дамыту, тепе-теңдік және көпвекторлы сыртқы саясат, жас-тарды қолдау. Президент белгілеп берген он бағыттың ішіндегі халықтың табысын арттыру және әл-ауқатын жақсарту, өңірлерді дамыту, тепе-теңдік және көпвекторлы сыртқы саясат, жастарды қолдау бағыттарына да Махмұт Ыбырайханұлы басқаратын компаниялар тобының, Кеңес Одағының Батыры, Халық Қаһарманы, Қазақстанның тұңғыш Қорғаныс министрі Сағадат Нұрмағамбетов атындағы Халықаралық патриоттық қоғамдық Қорының және «Qazaq» газетінің ұжымдары атсалысатын болады. Оған жоғарыда жасалған шаруалар куә бола алады.
Қасым-Жомарт Кемелұлы тәуелсіздіктің алғашқы күндерінен мемлекеттік басқару ісінде биік белестерден абыроймен өтіп, қажырлы еңбек пен кәсіби шеберліктің үздік үлгісін көрсетті. Сол себепті де елдің ертеңі үшін аса маңызды сәтте Елбасы мен Қазақстан халқы өзінің жарқын болашағын қамтамасыз ететін бірегей тұлға ретінде осынау жауапкершілікті Қасым-Жомарт Кемелұлына сеніп тапсырды.
Біз Қасым-Жомарт Кемелұлын жалпы-халықтық сайлауда айқын жеңіске жетіп, Қазақстан Республикасының Президенті міндетіне кірісуімен шын жүректен құттықтаймыз!

Махмұт Ыбырайханұлы Нәлібаев

басқаратын Кеңес Одағының Батыры, Халық Қаһарманы

Сағадат Нұрмағамбетов атындағы

Халықаралық патриоттық қайырымдылық Қоры мен

«Qazaq» газетінің ұжымдары

Жауап қалдырыңыз

Please enter your comment!
Please enter your name here