Ақмола облысында үздік сәндік-қолданбалы өнер шеберлері анықталды

0
2854

Көкшетауда Достық үйінің жанында орналасқан Арбат аумағында ел Тәуелсіздігінің 30 жылдығына арналған «Менің Отаным-менің Қазақстаным» сәндік – қолданбалы өнер шеберлері мен қолөнершілерінің облыстық байқауы өтті.

Шығармашылық іс-шарада облыс аудандары мен қалаларында өткен кезеңдердің қорытындысы бойынша іріктелген шеберлердің жұмыстары ұсынылды.
Конкурс қазақстандық патриотизмді тәрбиелеу, шеберлердің шығармашылық әлеуетін іске асыру, Қазақ ұлттық өнерін дамыту және еңбек құндылықтарын белсенді ілгерілету мақсатында «Қазақтану» ҚХА ғылыми-ағартушылық жобасы шеңберінде өткізілді.

Көкшетау,Степногорск, Қосшы қалалары мен облыстың 11 ауданынан 25 шебер мен қолөнершілер өздерінің бірегей және әсем бұйымдарын ұсынды. Авторлар ағаштан, былғарыдан, сүйектен, бисерден, киізден, жүннен, пластиктен, металдан жасалған бұйымдар, ұлттық нақыштағы бұйымдар, кесте тігу, киіз басу, тоқу, түрлі қолөнер, кәдесыйлар және басқа да түрлі жұмыстар ұсынды.

Байқау қатысушыларына облыс әкімінің орынбасары Айна Мүсрәлімова құттықтау сөз сөйледі.

«Менің Отаным – Менің Қазақстаным» жобасы біздің адамдарымыздың қаншалықты талантты екенін көрсетті, достық пен сенімді, этностар арасындағы жан-жақты шығармашылық, мәдени байланыстарды нығайтты, сәндік-қолданбалы өнер шеберлері мен қолөнершілерінің кәсіби өсуі мен қарым-қатынасы үшін шығармашылық атмосфера құрды. Мен барлық қатысушыларға Қазақстан халқының ұлттық дәстүрлері мен мәдени құндылықтарын насихаттағаны, халықтық қолданбалы өнерді дамытқаны үшін алғыс айтамын»,-деп атап өтті аймақ басшысының орынбасары.

Халық шеберлерінің үздік жұмыстарын Қазақстан халқы Ақмола ассамблеясының этномәдени бірлестіктері мен қоғамдық құрылымдарының төрағалары кірген құзыретті қазылар алқасы анықтады.

Бас жүлдені Шортанды ауданының суретшісі, қолөнер шебері Кәрім Бектас жеңіп алды, ол байқауға әр түрлі жануарлардың өңделген сүйектерінен жасалған бұйымдарды ұсынды.

Бірінші орынды Қосшы қаласынан Асхат Бозымбай, екінші орынды Көкшетаудан Кенжебай Смағұл, үшінші орынды Ерейментау ауданынан Әлем Нахшир иеленді.
Жеңімпаздар мен жүлдегерлер дипломдармен, алғыс хаттармен және естелік сыйлықтармен марапатталды.

Жауап қалдырыңыз

Please enter your comment!
Please enter your name here