Референдум нәтижесі саяси жаңғырудың анық символына айналды – Президент

0
106

Кеше ҚР Президенті Қасым-Жомарт Тоқаев 5 маусым күні өткен референдумның қорытындысы бойынша республикалық телеарналар арқылы Қазақстан халқына үндеу жасады.

ҚАЗАҚСТАН ДАМУДЫҢ ЖАҢА КЕЗЕҢІНЕ ҚАДАМ БАСТЫ

«Елімізде ерекше мәні бар тарихи оқиға болды. Мемлекетіміз дамудың жаңа кезеңіне қадам басты. Ата заңымызға ұсынылған өзгерістерді азаматтардың басым көпшілігі қолдады. Референдум жоғары деңгейде өтті. Мұны халықаралық және отандық байқаушылар да айтып жатыр. Конституциялық реформалар қоғамда қызу талқыланды. Дауыс беру барысы демократия талаптарына сай өтті. Ешқандай мәжбүрлік болған жоқ. Референдум нәтижесі саяси жаңғырудың анық символына айналды. Азаматтарымыз зор жауапкершілік танытты және отансүйгіштік қасиетін паш етті. Біз Жаңа, Әділетті Қазақстанды құру жолындағы бірлігіміз бекем екенін көрсеттік. Конституциялық түзетулер мемлекеттігіміздің тұғырнамасын түбегейлі өзгертеді. Бүкіл қоғамның дамуына тың серпін береді», – деген Қасым-Жомарт Тоқаев референдумға белсене қатысып, қолдау білдірген барша халыққа зор ризашылығын білдірді.

Президент Ата заңға өзгерістер енгізу реформалардың соңғы сатысын емес, енді басталғанын білдіретінін жеткізді.

«Біз елімізді жан-жақты жаңғыртуды жалғастырамыз. Жаңартылған Конституция негізінде биліктің барлық институты қызметінің мейлінше тиімді моделін қалыптастырамыз. Олардың арасындағы үйлесім мен тепе-теңдік механизмін нығайтамыз. Дәйекті саяси жаңғыру ұлттық экономиканы дамытуға, ұлттық кәсіпкерлікті нығайтуға ықпал етеді. Енді біздің алдымызда ашық әрі әділетті экономика құрып, заңнамаға реформа жүргізу міндеті тұр. Қолдан жасалған монополияларды түбегейлі жойып, сыбайлас жемқорлыққа тосқауыл қою маңызды», – деп санайды Қасым-Жомарт Тоқаев.

ӘДІЛЕТТІ ҚАЗАҚСТАНДА ПОЛИЦЕЙЛЕРДІҢ ОЗБЫРЛЫҒЫНА ЖОЛ БЕРІЛМЕЙДІ

Президенттің сөзінше, мемлекеттік аппаратты жаңғыртып, бюрократиядан барынша арылту үшін жүйелі жұмыс жалғасады, қоғамның барлық өкілдерінің талап-тілектеріне жауап беретін озық мемлекет құрылады.

«Мемлекеттік қызмет дегеніміз – жеке бастың бақ-дәулетін арттыратын жер емес. Бұл – туған халқыңның алдында үлкен жауапкершілік арқалау деген сөз», – деп кесіп айтты Қасым-Жомарт Тоқаев.

Қазақстан халқына үндеуінде Президент елден жылыстатылған қаржыны және заңсыз жекешелендірілген активтерді мемлекеттің иелігіне қайтару жөнінде Мекемеаралық комиссия құрылғанын, сол үшін арнайы Жарлыққа қол қойғанын айтты.

«Біз адам құқығы мен бостандығын қорғау жүйесін кешенді түрде күшейтуге негізделген бағдарымызды жалғастыра береміз. Құқықтық реформа аясында Конституциялық сот қайта құрылады. Оның қаулыларына жедел әрекет ету тетігін енгізу қажет. Сонда азаматтарымыз осы аса маңызды институт қызметінің пайдасын сезіне алады. Жаңа, Әділетті Қазақстанда полицейлердің озбырлығына, біліксіз прокурорлар мен біржақты судьяларға жол берілмейді. Қоғам құқық қорғау және сот жүйесінің шын мәнінде өзгергенін қалайды», – деп пікір білдірді Қасым-Жомарт Тоқаев.

Мемлекет басшысы елді дамытудың осы және басқа да мәселелері бойынша нақты шешімдерді қыркүйек айында өтетін Парламенттің кезекті сессиясының ашылуында айтатынын ескертті.

ҰЛТ ҰЯСЫ ҰЛЫТАУДА ҰЛТТЫҚ ҚҰРЫЛТАЙ ӨТЕДІ

Президент бұл реформалар құр атақ-абырой үшін қолға алынбағанын, мұның бәрі Жаңа, Әділетті Қазақстан құру үшін жасалып жатқанын баса айтты.

«Халқымызда «Кеңесіп пішкен тон келте болмайды» деген сөз бар. Бабаларымыз маңызды мәселені алқалы жиында шешкен. Мен осы дәстүрді жаңғыртып, Ұлттық құрылтай құру туралы бастама көтердім. Оған қоғамның түрлі топ өкілдері, беделді әрі белсенді азаматтар шақырылады. Құрылтайдың алғашқы отырысы ұлт ұясы – Ұлытауда өткізіледі. Осылайша, азаматтардың мемлекет ісіне атсалысу мүмкіндігі арта түседі. Шын мәнінде, еліміздің тағдыры – әрқайсымыздың қолымызда», – деп жаңа бастама көтерді Қасым-Жомарт Тоқаев.

Мемлекет басшысы құрғақ уәде мен бос сөз ешқайда апармайтынын айтып, өзі үшін нақты іс пен шынайы өзгеріс бәрінен маңызды екенін тілге тиек етті.

«Референдум қорытындысы біздің мемлекеттігіміздің тарихында мүлде жаңа дәуір басталғанын көрсетеді. Халқымыз өз таңдауын білдіру арқылы түбегейлі бетбұрыс жасауға ұмтылысын көрсетті. Жасампаз ел болуға деген ықылас-ынтасын байқатты. Елімізді дамыту үшін әлі де көп жұмыс атқаруымыз керек. Бүкіл ел болып жұмылсақ, көздеген мақсатымызға міндетті түрде жетеміз. Мен бұған кәміл сенемін. Бүгін тәуелсіз Қазақстанның даму тарихында жаңа дәуірге жол ашылды. Осы жолда бірлігіміз әрдайым бекем болсын! Жаңа Қазақстанды бәріміз бірге өркендетейік», – деп түйді сөзін Қасым-Жомарт Тоқаев.

Міне, Жаңа Қазақстан демократия жолымен дамудың жаңа дәуіріне аяқ басқалы тұр. Өйткені, жексенбі күні елдің саяси жүйесін өзгеріске ұшырататын тағдыршешті сәттен қалыс қалмаған халықтың басым бөлігі ҚР Конституциясының 33 бабына көзделіп отырған 56 өзгерісті қолдады.

Жанар ДӘУЛЕТҚЫЗЫ

Жауап қалдырыңыз

Please enter your comment!
Please enter your name here