Әл-Фараби атындағы Қазақ ұлттық университетінің Биология және биотехнология факультетінде Биофизика, биомедицина және нейроғылым кафедрасының профессоры Нұртай Торманұлының 85 жас мерейтойына арналған «Биологияны оқытудың формалары, әдістері пәнаралық байланыстары мен заманауи инновациялық тәсілдерін қолдану» атты дөңгелек үстел өтті.
Алқалы жиынның басты мақсаты – дәстүрлі және заманауи білім беру технологияларын біріктіретін биологияны оқытудың заманауи формалары мен әдістерін талқылау.
Іс-шарада Биофизика, биомедицина және нейроғылым саласындағы зерттеушілер мен практиктер арасындағы пәнаралық диалог арқылы білім беру үдерісіне инновациялық әдістерді енгізу мүмкіндіктері қарастырылды.
Жиынға биология және биотехнология факультетінің профессор-оқытушылар құрамы, ғалымдар мен зерттеушілер қатысты.
Дөңгелек үстел барысында жиналғандар ғалым Нұртай Торманұлын мерейтоймен құттықтап, оның маман даярлаудағы елеулі үлесін атап өтті.
Айта кетейік, Нұртай Торманов – әл-Фараби атындағы Қазақ ұлттық университеті биофизика және биомедицина кафедрасының профессоры, биология ғылымдарының кандидаты. Оның авторлығымен 18 оқу құралы мен оқулық және 200-ден астам ғылыми-әдістемелік мақала жарық көрген.
Нұртай Торманов – Қазақстан Республикасы «Білім беру ісінің үздігі», ҚР «Білім беру ісінің кұрметті қызметкері». Оның жетекшілігімен 30-дан астам магистрлер даярланған.
Жадыра АШИРОВА,
Биофизика, биомедицина және нейроғылым кафедрасы меңгерушісінің ғылыми-инновациялық жұмыс және халықаралық байланыстар жөніндегі орынбасары, PhD, доцент м.а.
