Еуропалық комиссияның вице-президенті Валдис Домбровскис Украина премьер-министрі Денис Шмыгальмен бірлескен брифинг барысында Брюссельден Киев наурыз айының соңына дейін «Ukraine Facility» бағдарламасы аясында 4,5 млрд еуро және сәуір айында 1,5 млрд еуро екінші транш көмек алатынын мәлімдеді.
Валдис Домбровскис Еуропалық Одақ қазірдің өзінде «Ukraine Facility» механизмін аяқтап жатқанын айтты.
Айта кетейік, 1 ақпанда Еуропалық кеңес Украинаға 2024-2027 жылдары 50 млрд еуроға бюджеттік көмек бағдарламасын бекітті. Еуропалық Одақ жыл сайын соманы қайта қарайды және бекітеді, ал көмек пакетіне вето қою мүмкіндігі алынып тасталды. 24 ақпанда Еуропалық комиссия басшысы Урсула фон дер Ляйен Еуропалық Одақ наурыз айында Украинаға 4,5 млрд еуроға алғашқы көмек траншын жіберетінін хабарлады. 27 ақпанда Еуропалық парламент Украинаға төрт жыл ішінде 50 млрд еуроға көмек бөлуге жақтап дауыс берді.
