Тастанбек Атақұлов 1944 жылы Түркістан облысы Мақтаарал ауданында дүниеге келген. Өз ауылында жетінші сыныпты бітірген соң, Мақтаарал ауыл шаруашылығы техникумына түсіп, 1965 жылы механизация мамандығын бітіріп, өзінің туған елінде, совхозда екі жыл аға инженер болып жұмыс атқарған.
Ауыл шаруашылығының механизация бағытын меңгерген соң, агрономия бағытын да меңгеру үшін 1972 жылы Қазақ ауыл шаруашылығы институтының агрономия факультетін үздік бітірген. Жоғарыдан бөлінген арнайы жолдамамен аспирантурада қалдырылады. Мелиорация кафедрасының меңгерушісі Қажымұхан Нұрғалиевтің жетекшілігімен Шығыс Қазақстан облысы Зайсан ауданында далалық ғылыми жұмыстармен шұғылдану басталады. Сол жылдан бастап (1972 ж.) осы уақытқа дейін үзіліссіз, Қазақ ұлттық аграрлық университетінде қызмет істеп келеді. Осы университетте қызметтің біраз сатысынан өтті, ассистенттен бастап профессорға дейін абыройлы еңбек етіп келеді.
Тастанбек Атақұлов 1981-2011 жылдар аралығында ауыл шаруашылық мелиорациясы, мелиорация және гидравлика, егіншілік және өсімдік шаруашылығы, агрономия кафедраларының меңгерушісі, ал 1992-1996 жылдар аралығында проректор қызметтерін атқарып, студент жастары мен әріптестерінің арасында үлкен абыройға ие болды.
Еліміздің ауыл шаруашылығына мамандар даярлаумен қатар, ол Республикамыздың суғармалы жерлерін, су көздерін тиімді пайдалану бағытында үздіксіз, нәтижелі ғылыми зерттеу жұмыстарын жүргізіп келеді. Осы өзекті мәселелер бойынша алты ғылыми жобаның жетекшісі болып, нәтижесінде 250-ден астам ғылыми еңбектері қазақ, орыс, ағылшын тілдерінде жарияланды, оның жетеуі импакфакторлы журналдарда жарық көрді. Суғармалы жерлерді, су көздерін тиімді пайдалану, дақылдарды инновациялық әдістермен өсіру мәселелері бойынша үш патент алды және өндіріске 15 ұсыныстар жасалды. Осы ұсыныстарды фермерлерге жеткізу үшін Жамбыл, Түркістан, Алматы облыстарының шаруа қожалықтарына, фермерлерге барып түсініктемелер берді. Осы мәселелер бойынша туған елімен тығыз байланыста болды, нәтижесінде Мақтаарал және Жетісай аудандарының құрметті азаматы атанды.
Профессор Тастанбек Атақұлов елімізге ғылыми мамандар даярлауда Оңтүстік Корея (Lim, Sang Cheol), Алмания (Kaze Heinz Koleez), Латвия (Kestytis Roma Нецкас), Өзбекстан (Худайберді Назаров) сияқты шетел ғалымдарымен бірге жұмыстар атқаруда.
Оның жетекшілігімен үш докторлық, төрт кандидаттық, үш доктор PhD, он сегіз магистрлік диссертациялар қорғалды, сонымен қатар студенттердің дипломдық жұмыстарына жетекшілік етті. Ауыл шаруашылық ғылымдарын дамытуға сіңірген еңбегі үшін 2004 жылы ҚР Білім және ғылым министрлігінің медалімен, ал 2013 жылы Ресей Академиясы Президиумының шешімімен А.И.Вавилов атындағы медальмен марапатталған, осы жылы ҚР ауыл шаруашылық ғылым академиясының академигі болып сайланды.
Тастанбек Атақұлов университет жанындағы докторлық диссертация қорғайтын диссертациялық кеңестің төрағасының орынбасары, төрағасы ретінде мемлекетіміздің іргелі ғалымдар саласына мамандар даярлауға белсене араласты. Жоғары оқу орындары студенттеріне қазақ тілінде он екі оқулық, он төрт оқу құралы, көптеген әдістемелік нұсқаулар және типтік оқу бағдарламаларын дайындады. Жоғары дәрежеде сапалы оқулықтар дайындағаны үшін 2004 жылы А.Байтұрсынов атындағы қола, ал 2014 жылы алтын медальдардың иегері болды. Ауыл шаруашылығына мамандар даярлауға сіңірген еңбегі үшін 2005 жылы, “Ерен еңбегі үшін”, 2024 жылы ҚР ауыл шаруашылығы министрлігінің “Еңбек ардагері” медальдарымен марапатталған, ал 2007 жылы “ҚР жоғары оқу орындарының үздік оқытушысы” мемлекеттік грантының иегері болды.
Тастанбек Атақұлұлы өзінің сексен жасында күнделікті шұғылданатын дене шынықтыруын, волейболын жалғастырып, сонымен қатар шығармашылық ой-өрісі толысқан дер шағында.
Қазіргі уақытта профессор Тастанбек Атақұлов Қазақ ұлттық аграрлық зерттеу университетінің «Агрономия, селекция және биотехнология» кафедрасының профессоры қызметін атқаруда, сонымен қатар суғармалы жерлерді қарқынды пайдалану бағытында ғылыми жұмыстарын жалғастырып келеді.
Оның 80 жылдық мерейтойы күні біз профессор, ғалымға денсаулық, игілік және ғылыми ұстаздық қызметтеріне табыс, барлық шығармашылық мақсаттарының орындалуына тілектестік білдіреміз!
Карима МЫРЗАБЕК,
Ауыл шаруашылығы ғылымдарының кандидаты, қауымдастырылған профессор
