Ақтауға ұшақ апатын бірлесіп тергеу үшін Әзербайжаннан арнайы комиссия келді. Делегацияны Әзербайжанның төтенше жағдайлар министрі бастап келді. Бұл туралы Маңғыстау облысының әкімдігі хабарлады.
Маңғыстау облысының әкімі Нұрдәудет Қилыбай пен Әзербайжан үкіметінің өкілдері құтқару операциясы аясында жасалатын тиісті шараларды пысықтады. Қилыбай зардап шеккен азаматтарға қажетті көмек көрсетіліп жатқанын айтты.
Айта кетейік, Әзербайжаннан келген комиссияның құрамына төтенше жағдайлар министрінен бөлек бас прокурордың орынбасары, денсаулық сақтау министрінің орынбасары, азаматтық авиация агенттігі басшысының орынбасары және AZAL әуе компаниясының вице-президенті кіреді.
Сондай-ақ осы елдің президенті Ильхам Әлиев ұшақ апатын тергеу бойынша мемлекеттік комиссияны құруды тапсырды. Оны премьер-министр Әли Асадов басқарады.
Қазақстан да Ақтау қаласы маңында болған қайғылы оқиғаның себеп-салдарын тексеру үшін үкіметтік комиссия құрды. Ал Тоқаев Әзербайжан президентіне көңіл айтты.
Еске сала кетейік, бүгін Бакуден Грозныйға ұшқан Azerbaijan Airlines ұшағы Ақтау қаласының маңында апатқа ұшырады. Бортта 69 адам, оның ішінде 5 экипаж болған. Жаңартылған мәлімет бойынша 32 адам апаттан аман қалған.
