Референдумда дауыс беру үшін нені білу керек?

0
468

Қазақстан Президенті Қасым-Жомарт Тоқаев 5 мамырда Конституцияға өзгеріс енгізу туралы республикалық референдум өткізу жөніндегі Жарлыққа қол қойды. Референдум 5 маусымға белгіленді. Яғни, елдің саяси жүйесін өзгеріске ұшырататын тағдыршешті сәтке 5 күн ғана қалды. Осыған байланысты референдумға қалай және қайда барып дауыс беру нұсқаулығын ұсынамыз.

Сайлау учаскесін қалай іздейміз?

Сайлау учаскесін келесі ақпарат ресурстарына кіріп табуға болады:

  • gov.kz/referendum;
  • referendum.gov.kz;
  • referendum2022.gov.kz.

Қазақстан азаматы ЖСН нөмірі арқылы өзінің учаскесін таба алады. Ал, табылмаған жағдайда, ақпарат ресурсының соңында әкімдіктердің call орталығының тізімі шығады. Солардың біріне хабарласып, қайда барып дауыс беру керектігін білуге болады. Осыған ұқсас қызмет Kaspi.kz және Халық банкінің Homebank қосымшасында әзірленіп жатыр.

Дауыс беру үшін не істеу керек?

  1. 5 маусым күні жеке куәлікпен тіркелген мекенжай бойынша азамат тиісті учаскеге келеді;
  2. Референдум комиссиясының мүшелерінен бюллетеньді алады;
  3. Дауыс беру кабинасына өтеді;
  4. «Иә» немесе «жоқ» жауаптарының бірін белгілейді;
  5. Бюллетеньді дауыс беру жәшігіне салады.

Шетелде жүрген қазақстандықтар қалай дауыс береді?

Қазақстанның 52 шетелдегі мекемелерінде 65 комиссия учаскесі құрылды. Азаматтар сол жерге келіп дауыс бере алады.

Қазақстанның шетелдердегі мекемелерінің жанындағы дауыс беру «Қазақстан Республикасындағы сайлау туралы» ҚР Конституциялық Заңының 38-бабының 1-тармағына сәйкес  референдум  өткізілетін  күні – 2022  жылдың  5 маусымында жергілікті  уақыт бойынша сағат 07:00-ден 20:00-ге дейін өткізіледі.

Түзетулер енгізілуі үшін қанша дауыс қажет?

Бұған дейін Орталық сайлау комиссиясының мүшесі Шавкат Өтемісов түзету енгізілуі үшін қанша дауыс қажет екенін айтқан еді. Оның айтуынша, егер референдумға қатысқандардың 50 пайыздан астамы оған нақты дауыс берсе, түзету қабылданады.

Айта кетейік, референдумға 11,72 млн адамның қатысуға құқығы бар.

Жауап қалдырыңыз

Please enter your comment!
Please enter your name here