Айман Омарова: «Президент қана мемлекетті сақтап қала алды»

0
755

Кеше, 14 наурызда ҚР Парламенті Мәжілісінің төрағасы Ерлан Қошановтың төрағалығымен өткен Мәжілістің жалпы отырысында қаңтар оқиғасын зерттейтін қоғамдық комиссияның төрайымы, адвокат Айман Омарова қаңтардағы жағдайды тұрақтандырудағы Мемлекет басшысының ерекше рөлін атап өтті.

«Қаңтар күндерінде не болғанын бәрі білгісі келеді. Бұл бейбіт митингілер болды ма, әлде билікті күшпен басып алу әрекеті болды ма? Қаңтар оқиғаларының негізі билікті күшпен тартып алу әрекеті болғаны күмәнсіз. Қылмыстық құқық бұзу фактілерінің бәрі осы мақсатқа қол жеткізудің тәсілі болған. Билікті күшпен басып алудың Қылмыстық кодекстің 179-бабының екінші бөлігінде мынандай диспозициясы бар: «Билікті күшпен басып алуға бағытталған әрекеттер немесе билікті күшпен ұстап тұру әрекеттері – Қазақстан Конституциясын бұзу немесе Қазақстан Республикасының конституциялық құрылымын күшпен бұзу». Бұл хаосты Президент қана өзінің әрекетімен тоқтатып, мемлекетті сақтап қала алды», – деп өз ойын білдірді Айман Омарова.

Айта кетейік, Айман Омарова басқаратын «Ақиқат» қоғамдық комиссиясының мәліметінше, Алматыдағы тергеу изоляторында отырған үш студент Азамат Амангелдиев, Азат Уәли және Дастан Жайылғановқа қатысты бұлтартпау шаралары өзгертіліп, үйқамаққа ауыстырылған. Оларға ҚР ҚК-нің 272-бабының екінші бөлігі бойынша айып тағылған. Сот олардың қару-жарақ тасығанын көрсететін видеоларды алға тартты. Алайда, олар мәжбүрлі түрде барған. Яғни, дайындалған қарулы адамдардың қорқытуымен 5 қаңтарда алаңға барып, заңсыз әрекеттер жасаған. Митингке қарумен қорқытып апарғаны туралы басқа да адамдар айтып жатыр. Сондықтан аталған комиссия бұл студенттерге қатысты істі тоқтатуды ұсынған.  Студенттердің айтуынша, олар бесеу болған, біреуін атып тастаған және қорқытқан. Маска киген қарулы адамдар бір-бірімен басқа тілмен сөйлескен, сондықтан олардың айтқанын істеуге тура келген. Бұл «Ақиқат» қоғамдық комиссиясы атқарып жатқан көп жұмыстың бірі ғана.

Жауап қалдырыңыз

Please enter your comment!
Please enter your name here