17 қазанда өткен Орталық сайлау комиссиясының отырысында 20 қарашада өтетін кезектен тыс президент сайлауына 43 байқаушы аккредиттелгені хабарланды.
«Биылғы 22 қыркүйекте ОСК 20 қарашаға тағайындалған кезектен тыс ҚР президенті сайлауына халықаралық байқаушылар институтын ашқан болатын. ҚР-дағы сайлау туралы Конституциялық заңның 20-бабы бойынша шет мемлекеттердің, халықаралық ұйымдардың байқаушыларын аккредиттеуді ҚР ОСК Сыртқы істер министрлігінің ұсынысы бойынша жүзеге асырады. СІМ сайлауды байқауға қатысу үшін халықаралық ұйымдар мен шет мемлекеттерге тиісті шақырулар жолдады. Сонымен қатар, екіжақты негізде ҚР ОСК атынан 28 шет мемлекеттің орталық сайлау органдарына шақыру жіберілді. Бүгінгі таңда ҚР ОСК-ге Сыртқы істер министрлігінен 4 халықаралық ұйым мен 1 шет мемлекеттен 43 байқаушы аккредиттеуге ұсынылды», – деді ҚР ОСК хатшысы Мұхтар Ерман.
Оның нақтылауынша, ТМД-дан – 6, ТМД-ға қатысушы мемлекеттердің парламентаралық ассамблеясынан – 17, Сайлауды байқау жөніндегі ЕҚЫҰ-ның демократиялық институттар және адам құқықтары жөніндегі бюросынан – 13, Түркі мемлекеттері ұйымынан – 5, Грузиядан – 2 байқаушы аккредиттеуге ұсынылып отыр. Осыған орай аталған байқаушыларды аккредиттеу туралы ОСК қаулы қабылдады.
