Бизнес-идеяны іске асыру үшін грант алуға өтінім қабылдау басталды

0
521

Ағымдағы жылдың 1 сәуірінен бастап жаңа бизнес-идеяларды іске асыру үшін қайтарымсыз гранттар алудың бірінші легіне өтінімдер қабылдау басталды. Өтінімдерді қабылдау Business.enbek.kz порталы арқылы онлайн режимінде жүзеге асырылады. Биыл 2 019 грант беру жоспарланған. Оның 1 089-ы жастарға және 930-ы халықтың әлеуметтік осал топтарына арналған. Бұл туралы ҚР Еңбек және халықты әлеуметтік қорғау министрлігі хабарлады.

Өтінімдерді қабылдау 10 жұмыс күніне, яғни 14 сәуірге дейін созылады, содан кейін аудандық/ қалалық комиссия берілген өтініштерді қарайды. Комиссия отырыстарында үміткерлер өздерінің бизнес-жобаларын таныстырады. Өтінім берілген күн комиссияның шешіміне әсер етпейді.

«Биыл өтінімдерді қабылдау 7 лек шеңберінде кезең-кезеңімен жүзеге асырылады. Мұндай шешім азаматтардың «Бастау Бизнес» жобасы бойынша оқудан өтіп үлгеруі үшін қабылданды. Гранттар бір рет беріледі. Бұл ретте, бизнес-жобасын комиссия қарау барысында мақұлдамаған үміткер келесі ағындардың біріне өтінімді қайта бере алады», – делінген министрлік хабарламасында.

Биыл барлығы 20 мың грант бөлу жоспарланып отыр. Соның ішінде жастар мен халықтың әлеуметтік осал топтарынан шыққан адамдар үшін (атаулы әлеуметтік көмек алушылар; көпбалалы отбасы мүшелері – көпбалалы отбасылар бойынша жәрдемақы алушы және (немесе) оның жұбайы (зайыбы); оңтүстік өңірлерден солтүстікке қоныс аударушылар; қандастар; мүгедектігі бар балаларды тәрбиелеп отырған отбасы мүшелері; мүгедектігі бар адамдар) 10 мың грант беру көзделуде.

Нысаналы санаттардан басқа, үміткерлер мынадай критерийлердің біріне сәйкес келуі тиіс:

  • халықты жұмыспен қамту орталығында тіркелген жұмыссыз азамат;
  • Қазақстан Республикасының салық заңнамасына сәйкес бірыңғай жиынтық төлемді төлеуші;
  • өтініш берген сәтте мәртебесін ресімдеу мерзімі 1 жылға дейінгі жеке кәсіпкер;
  • жеке қосалқы шаруашылықпен айналысатын тұлға.

«Бастау Бизнес» жобасы бойынша кәсіпкерлік негіздеріне оқытуды аяқтау туралы қолданыстағы сертификаттың және оқыту барысында дайындалған бизнес-жоспардың болуы міндетті болып табылады. Бұдан басқа, грант алуға үміткердің тұрғылықты жері бойынша кемінде 1 жыл тұрақты немесе уақытша тіркеуі болуы тиіс. Жұмыспен қамтуға жәрдемдесу шараларының қазіргі қатысушылары, сондай-ақ, 12 ай бұрын жұмыспен қамтуға жәрдемдесу шараларына қатысуды өз еркімен, дәлелсіз себеппен тоқтатқан адамдар грантқа үміткер бола алмайды», – деп түсіндірді министрлік өкілдері.

Өтінім беру үшін электрондық цифрлық қолтаңбаны пайдалана отырып, порталда тіркелу, өтініш нысанын толтыру және ЭЦҚ көмегімен қол қою қажет.

Интернетке немесе компьютерге қолжетімділік болмаған жағдайда, халықты жұмыспен қамту орталықтарының өзіне-өзі қызмет көрсету аймақтарында, халыққа қызмет көрсету орталықтарында, кәсіпкерлерге қызмет көрсету орталықтарында өтінім беруге болады.

Гранттарды үміткерлердің өтініштерін қарау жөніндегі комиссияның шешімі негізінде халықты жұмыспен қамту орталықтары беретін болады. Комиссия мүшелері бизнес-жоспарды келесі критерийлер бойынша бағалайды:

  • бизнес-идеяның бәсекеге қабілеттілігі;
  • өткізу нарықтарының пысықталуы;
  • бизнес-жобаның қаржылық өміршеңдігі;
  • кәсіпкерлік дағдылар деңгейі;
  • жаңа жұмыс орындарын құру.

Шешім шығарылғаннан кейін порталдағы үміткердің жеке кабинетіне хабарлама жіберіледі. Комиссияның оң шешімі болған жағдайда үміткер тиісті хабарламаны алған сәттен бастап 3 жұмыс күні ішінде порталда банк деректемелері бар банк шотын ұсынуы тиіс. Бұдан өзге, порталда хабарлама алған сәттен бастап 3 жұмыс күні ішінде грант алушы жеке кабинетте ЭЦҚ пайдалана отырып, шартқа қол қоюы тиіс.

Айта кетейік, Business.Enbek – азаматтардың кәсіпкерлік бастамаларын қолдау порталы, кәсіпкерлікті дамытудың 2021-2025 жылдарға арналған ұлттық жобасы шеңберінде мемлекеттік қолдау шараларын алуға арналған онлайн өтінімдерді қабылдаудың бірыңғай терезесі. Мұнда Сіз ұсынылатын шаралардың шарттарымен егжей-тегжейлі танысып, өтінімдерді нақты уақыт режимінде қарау мәртебесін қадағалай аласыз. Биыл өтінімдерді қабылдау 7 лек шеңберінде кезең-кезеңімен жүзеге асырылады. Келесі ағындар бойынша өтінім беру күні алдын ала порталда, БАҚ және әлеуметтік желілерде жарияланады. Қосымша ақпарат алу үшін тұрғылықты жері бойынша жұмыспен қамту орталықтарына жүгінуге болады.

Жауап қалдырыңыз

Please enter your comment!
Please enter your name here