28 қаңтарда Нұр-Сұлтан қаласы әкімдігінің Музыкалық жас көрермен театры ұжым болып қалалық №2 емханада қауіпті індетке қарсы екпенің үшінші компонентін салдырды.
Қауіпті індеттен қорғанудың жалғыз жолы – ревакцинация. Соңғы уақытта әлемде де, елімізде де ауру саны қайтадан өсуде. Сондықтан театр директоры Асхат Максимұлы өзі бастап, өнер иелері екпенің үшінші кезеңіне қатысып, халыққа қажеттілігін көрсетіп, ауырып ем іздегенше ауырмаудың жолын өз ісімен көрсетуде.
«Осы ақпан айынан бастап біздің Музыкалық жас көрермен театры қойылымдарын өз көрермендеріне тарту етеді. Сол себепті көрермендердің қауіпсіздігі біз үшін бірінші кезекте. Сондықтан көрермендеріміздің қойылымды қауіп-қатерсіз тамашалап отыруы біз үшін маңызды. Театр басшысы ретінде өзім бастап, артистеріміз бен режиссерларымыз бүгін ревакцинация алып жатырмыз. Қазіргі таңда 20-дан астам театр артистері алды. Жалпы жаппай ревакцинациялау арқылы ұжымдық иммунитет қалыптасқанда ғана індетті жеңетінімізді біз жақсы білеміз», – деді театр директоры Асхат Максимұлы.
Алдағы уақытта театрға көрермендердің келуіне мүмкіндіктер жасалып жатыр. Сондықтан сахнада өнер көрсететін театр артистері ереже бойынша екпенің екінші кезеңнен 6 ай өткеннен кейін өздері келіп ревакцинациядан өте беретін болады.
Әділғазы Бақытұлы
