Осыдан төрт жыл бұрын Қырғыз Республикасы Парламентінің (Жогорку Кеңеш) депутаттары өздерінің ұлттық бас киімі – ақ қалпақты елдің басқа да ұлттық белгілері, атап айтқанда, мемлекеттік ту, елтаңба және әнұранмен теңестіруді, осылайша оған ұлттық мәртебе беруді ұсынған еді. Заң жобасында Қырғызстан президентінен бастап премьер–министрді, парламент спикерлерін ресми қабылдаулар мен шетел сапарларында, спортшыларды халықаралық жарыстарда ұлттық бас киімді киіп жүруге міндеттеу көзделді. Дегенмен, аталған заң жобасынан кейбір нормалар алынып тасталды. Сөйтіп, үш жыл бұрын Жогорку Кеңеш депутаттары ақ қалпақ мәртебесін заңмен бекітті. Халық қалаулыларының айтуынша, бұл ұлттың рухани дамуы мен ғасырлар бойғы дәстүрінің сақталуына, қырғыз халқының әлемге танылуына септігін тигізеді. Сонымен қатар, заңда ақ қалпақты дұрыс пайдаланбағандарды жазалау да қарастырылған. Осылайша, ұлттық бас киімдерін ұлықтауда қырғыздар көпке үлгі болды. Ғасырдан астам тарихы бар «Qazaq» газеті бүгін Алатаудың арғы жағындағы айыр қалпақты ағайындардың ұлттық құндылықтарын қалай ұлықтап жүргеніне тоқталады.
АҚ ҚАЛПАҚ КҮНІ
2016 жылы Қырғыз Республикасының Парламенті ұлттық бас киім күнін ресми мереке ретінде бекітті. Сөйтіп, 2019 жылдан бері қырғыздар 5 наурызды Ақ қалпақ күні ретіне атап өтеді. Ал, бұл күн 2011 жылдан бері бейресми тойланып келген еді.
ӘЛЕМДЕГІ ЕҢ ҮЛКЕН БАС КИІМ
2016 жылы биіктігі 3 метр болатын әлемдегі ең үлкен ақ қалпақ Гиннестің рекордтар кітабына енді. Алып ақ қалпақты өз қаржыларына Манас атындағы Қырғыз-түрік университетінің студенттері арнайы тіккізген екен.
ҚАЛПАҚ ПІШІНДЕС АЯЛДАМАЛАР
Қырғызстанда жүздеген қалпақ пішіндес аялдамалар бар. Бұл аялдамалар сонау Кеңес Одағының тұсында салынған. Кезінде КСРО-ның сәулет өнерін зерттеген канадалық суретші Кристофер Хервигтің өзі бұл аялдамаларға тамсанған деседі.
«АҚ ҚАЛПАҚ» МЕЙМАНХАНАСЫ
Ыстықкөлдің сол жағалауында «Ақ қалпақ» мейманханасы орналасқан. Оның akkalpak.kg сайты мен әлеуметтік желілердегі парақшасынан байқағанымыз, 2-4 орындық бөлмелері бар мейманхананың бағасы да қолжетімді және жыл бойы қонақтарды қабылдайды.
KALPAKMAN ПАРАҚШАСЫ
Әлемге әйгілі Instagram әлеуметтік желісінде Кalpakman деп аталатын арнайы парақша бар. Қырғыз халқының өмірінен сыр шертетін бұл парақшаға 225 мыңға жуық оқырман жазылған.
«АҚ ҚАЛПАҚ» САЯСИ ПАРТИЯСЫ ЖӘНЕ БАСҚАЛАР…
Қырғызстанда Улукбек Маматаев (суретте) басқаратын «Ақ қалпақ» саяси партиясы бар. Дегенмен, 2012 жылы құрылған партияның көрші елде саяси салмағы жоқ. Сонымен қатар, ақ қалпақ пішіндес кәдесыйлар, оған арналған әндер, бейнебаяндар, оның атындағы мейрамханалар мен дүкендер жетіп артылады.
ТОБЫҚТАЙ ТҮЙІН
Ақ қалпақ – қырғыз халқының символы, оны ұлттан бөле-жара қарауға болмайды. Тіпті, олар қысы-жазы басынан тастамайтын ақ қалпақты да ұлттық мақтанышқа айналдырып, ел өркендеуінің өзегін де сонымен байланыстырады. Көрші елдің ұлтжанды азаматтарының бастамасымен 5 наурыз – Ақ қалпақ күні ретінде белгіленуінің және ақ қалпақтың ЮНЕСКО-ның материалдық емес мәдени мұраларының тізіміне енуінің өзі – тарихи оқиғалардың бірі. Ал, 2019 жылы Жогорку Кеңеш депутаттарының ақ қалпақ мәртебесін Заңмен бекіткені, қырғыздардың әлемге ұлттық құндылықты ұлықтаудың жарқын үлгісін паш еткендері болып саналады.
Мадияр ӘЗИЗҰЛЫ
