Орталық сайлау комиссиясының отырысы өтті

0
204

Бүгін, 20 қараша күні 2021 жылғы 10 қаңтарға тағайындалған Қазақстан Республикасы Парламенті Мәжілісінің және мәслихаттарының депутаттарын сайлау жөніндегі науқан шеңберінде Қазақстан Республикасы Орталық сайлау комиссиясының отырысы өтті. Отырысқа саяси партиялардың, Әділет министрлігінің өкілдері, БКБ режимінде аумақтық сайлау комиссиялары, онлайн режимінде бұқаралық ақпарат құралдарының өкілдері қатысты.

Отырыста келесі мәселелер қарастырылды:

1) Кейбір саяси партияларды партиялық тізімдер бойынша сайланатын Қазақстан Республикасы Парламенті Мәжілісінің және мәслихаттарының депутаттарын сайлауға жіберу туралы.

2) 2021 жылғы 10 қаңтарға тағайындалған Қазақстан Республикасы Парламенті Мәжілісі және мәслихаттар депутаттарының сайлауына халықаралық ұйымның байқаушыларын аккредиттеу туралы.

Күн тәртібіндегі бірінші мәселе бойынша Қазақстан Республикасы Орталық сайлау комиссиясының мүшесі Асылбек Смағұлов сөз сөйледі. Ол 2020 жылғы 5 қарашада Орталық сайлау комиссиясы 6 саяси партияны Парламент Мәжілісі депутаттарын және партиялық тізімдер бойынша сайланатын мәслихаттар депутаттарын сайлауға қатысуға жіберу туралы қаулы қабылдағанын хабарлады.
Сонымен қатар, Қазақстан Республикасы Әділет министрлігінің ақпараты бойынша 2020 жылғы 11 қарашада «Бірлік» саяси партиясы қайта тіркеуден өтіп, «ADAL» саяси партиясы болып атауын өзгертті. Сондай-ақ, 2020 жылғы 12 қарашада Қазақстан Коммунистік Халық партиясы да тіркеуден өтіп, Қазақстан Халық партиясы болып өзгерді.

«ADAL» саяси партиясының және Қазақстан Халық партиясының барлық филиалдары 14 облыстың әділет органдарында, сондай-ақ Нұр-Сұлтан, Алматы және Шымкент қалаларында есептік қайта тіркеуден өтті. Осылайша, Орталық сайлау комиссиясы «ADAL» саяси партиясы мен Қазақстанның Халық партиясын Қазақстан Республикасы Парламенті Мәжілісі мен мәслихаттары депутаттарын сайлауға қатысуға жіберу туралы қаулы қабылдады.

Күн тәртібіндегі бірінші мәселені түйіндей келе, Ортсайлауком Төрағасы Берік Имашев «ADAL» партиясы Түркістан облысында өз филиалын қайта тіркеуді және Шымкент қаласында партия филиалын есептік тіркеуді жүзеге асырғанын атап өтті. Осылайша, партия барлық өңірлердегі мәслихаттарға сайлауға қатысуға жіберілді.

Отырыстың екінші мәселесі бойынша Орталық сайлау комиссиясының мүшесі Анастасия Щегорцова сөз сөйледі. Өз баяндамасында А.Щегорцова сайлау туралы Конституциялық заңның 20-2-бабына сәйкес шет мемлекеттердің, халықаралық ұйымдардың байқаушыларын аккредиттеуді Сыртқы істер министрлігінің ұсынуы бойынша Орталық сайлау комиссиясы жүзеге асыратынын хабарлады.

Осыған байланысты Сыртқы істер министрлігінің 2020 жылғы 17 қарашадағы ұсынысы бойынша аккредиттеуге 29 байқаушы ұсынылды. Олардың барлығы аккредитациялауға шығарылды. Барлық 29 байқаушы Тәуелсіз Мемлекеттер Достастығына (ТМД) қатысушы мемлекеттердің Парламентаралық Ассамблеясынан аккредиттеледі. Аккредиттеуге ұсыныстардың келіп түсуіне қарай байқаушылар бойынша деректер жаңартылатын болады.

Халықаралық бақылау институтын ағымдағы жылдың 22 қазанында Орталық сайлау комиссиясы ашқан болатын.

Отырыстан кейін бұқаралық ақпарат құралдары үшін брифинг өтті, онда Ортсайлауком мүшелері БАҚ сұрақтарына жауап берді.

Жауап қалдырыңыз

Please enter your comment!
Please enter your name here