Астана әкімдігінің қаулы жобасы бойынша бас қалада қоғамдық көлікпен жүру ақысы 110 теңге болатыны белгілі болды. Ал жолаушы қолма-қол ақшамен төлейтін болса, ол 220 теңге төлейді.
Сондай-ақ, жолақы өзге де тасымал түрлері үшін өзгереді. Айталық жедел, яғни экспресс қоғамдық көліктермен жол жүру ақысы 250 теңге болып белгіленсе, қолма-қол төлем жағдайында бұл қызмет құны 350 теңге болады.
Ал қала маңына қатынайтын қоғамдық көліктермен жүру үшін төлемақы «бір шақырым үшін 9 теңге 50 тиын» тарифімен есептеледі. Бұл электрондық жол жүру құжаты немесе электрондық төлемнің қосымша қызметтері арқылы қолма-қол ақшасыз төлеу кезіндегі баға. Ал қолма-қол төлем үшін тариф «бір шақырым үшін 14 теңге» болып бекітіледі.
Еске салайық, қазіргі таңда Астанада жолақы құны – 90 теңге. Қала әкімі Жеңіс Қасымбек бұған дейін Астанада 2024 жылы жолақы бағасы артуы мүмкін екенін айтқан болатын.
Жобаны жария талқылау мерзімі – 5 наурызға дейін. Қаулы алғашқы ресми жарияланған күнінен кейін күнтізбелік он күн өткен соң қолданысқа енгізіледі.
