ҚР Бас прокуратурасының Баспасөз қызметі жол саласының жай-күйін тексеру қорытындысын ұсынды. Қадағалаушы органның мәліметінше, заң бұзушылықтар мен бюджет қаражатын заңсыз алу схемаларын мердігерлер жиі пайдаланған. Атап айтқанда, осындай фирмалардың бірінің өкілдері Ақмола өңірінің Қоянды кентінде 907 млн теңгеге күрделі жөндеу және жергілікті жол құрылысын жасамағандығы белгілі болды.
Міне, осы дерек бойынша қазір шарт бұзылды, өңірдегі прокурорлар сотқа дейінгі тергеп-тексеруге бастамашылық жасап, оның шеңберінде қылмыстық құқық бұзушылық жасаудың мән-жайлары анықталып жатыр.
Солтүстік Қазақстан облысында облыстық жолдарды жөндеуге бөлінген 423 млн теңгені жымқырды деген айыппен Ғ. Мүсірепов атындағы аудан әкімдігінің және жергілікті мердігер мекеменің басшылары қамауға алынып, жауапқа тартылды.
Жұмыстарды қабылдау туралы жалған актілер бойынша жолдың жоқтығына қарамастан, миллиондаған мемлекеттік қаржыны аударған.
Мемлекеттік сатып алу кезінде өнім жеткізушілер таңдау кезеңі автожолдар саласындағы неғұрлым жемқорлықпен байланысты болып табылды. Мәселен, аудан прокурорларының араласуынан кейін Аршалы ауданы әкімдігінің бөлім басшысы Екатеринбург-Алматы автобанынан Берсуат ауылына дейінгі учаскені күрделі жөндеу бойынша 1,1 млрд теңгеге заңсыз шарт жасасқаны үшін теріс себептермен жұмыстан босатылған болатын.
Прокурорлар бюджеттің негізсіз шығындарының жолын кесуге ерекше назар аударады. Айталық, Шығыс Қазақстан облысының Алтай ауданында жөнделген учаскеге 148 млн теңгеден астам бюджет қаражатын артық жұмсау фактісінің жолы кесілді және басшылық буындағы кінәлі лауазымды тұлға лайықты тәртіптік жазаға тартылды.
Тексеру қорытындысы бойынша барлығы 300-ден астам заң бұзушылық анықталды, 30 млрд теңге сомасына бюджет шығындарына жол берілмеді, мемлекет кірісіне 2,5 млрд теңге өтелді, 29 қылмыстық іс қозғалды, 305 адам тәртіптік және әкімшілік жауапкершілікке тартылды.
Жолдардың қанағаттанарлықсыз жағдайына орынсыз жоспарлау, инновацияларды енжар енгізу, беріктігі жоғары материалдарға үнемдеу сияқты факторлар ықпал етіп отыр. Осыған байланысты Бас прокуратура Үкіметке қаралып жатқан шетелдік озық тәжірибеге негізделген көлік жолдары саласын түбегейлі өзгерту бойынша ұсыныстармен қадағалау актісін енгізді.
