Орталық референдум комиссиясының хатшысы Мұхтар Ерман 2024 жылғы 1 қазандағы ведомство отырысында Қазақстанда 6 қазанда өтетін АЭС құрылысы бойынша референдумның барысын кім қадағалайтынын айтты.
Мұхтар Ерман 30 қыркүйекте Астана уақытымен сағат 18.00-де шет мемлекеттерден, халықаралық ұйымдардан байқаушыларды, шетелдік БАҚ өкілдерін референдумға аккредиттеу аяқталғанын атап өтті.
«30 шет мемлекеттің, оның ішінде төрт ірі халықаралық ұйымның атынан 177 байқаушы аккредиттелген. Қазақстан Республикасының Сыртқы істер министрлігі бес ірі халықаралық ұйымға, соның ішінде ЕҚЫҰ/ДИАҚБ, ТМД, ШЫҰ, ОТГ және СВДМА сияқты референдумды байқауға қатысуға шақыру жіберді. 17 қыркүйекте біз ЕҚЫҰ-ның Демократиялық институттар және адам құқықтары жөніндегі бюросынан алдағы айларға жоспарланған сайлауға байланысты іс-шаралардың көптігін ескере отырып, 6 қазандағы референдумға мониторингті бастау мүмкін еместігі туралы жауап алдық», – деді Мұхтар Ерман.
Референдумның барысын ТМД, ШЫҰ, ОТГ және АӨСШК сияқты халықаралық ұйымдардың өкілдері бақылайды.
