2026 жылғы 29 маусымда Кенжеғали Сағадиев атындағы Халықаралық бизнес университетінде (UIB) түлектерге диплом тапсырудың салтанатты рәсімі өтті. Биыл университетті 720 түлек бакалавриат және магистратура білім беру бағдарламалары бойынша сәтті аяқтады. Олардың 37-сі үздік диплом иегері атанды. Бұл күн әрбір түлек үшін өмірдің маңызды белесі болып, студенттік кезеңнің аяқталып, жаңа кәсіби жолдың басталуын білдірді.
Салтанатты рәсімге университет басшылығы, профессор-оқытушылар құрамы, құрметті қонақтар, сондай-ақ түлектердің ата-аналары мен жақындары қатысты. Құттықтау сөздерінде олар жас мамандарға өз күшіне сенімді болуды, кәсіби тұрғыдан дамуды, батыл шешім қабылдап, биік белестерді бағындыруды тіледі.
Оқу жылдары барысында студенттер сапалы білім алып қана қоймай, практикалық тәжірибе жинақтап, халықаралық бағдарламаларға, ғылыми жобаларға, студенттік ұйымдар мен қоғамдық жұмыстарға белсенді қатысты. Осындай жан-жақты білім беру тәсілі UIB түлектеріне Қазақстанда ғана емес, шетелде де табысты мансап құруға мүмкіндік береді. Сонымен қатар, университет түлектерінің жұмысқа орналасу көрсеткіші 85%-ды құрайды. Бұл көрсеткіш мамандарды даярлау сапасының жоғары екенін, білім беру бағдарламаларының еңбек нарығындағы сұранысқа ие екенін және жұмыс берушілердің университетке деген сенімін айқын көрсетеді.
Кенжеғали Сағадиев атындағы Халықаралық бизнес университеті 2026 жылғы түлектерді оқуын сәтті аяқтауымен шын жүректен құттықтап, әрқайсысына өз мақсаттарына нық қадам басып, ең батыл армандарын жүзеге асырып, кәсіби ортада өз альма-матерінің абыройын асқақтата беруіне тілектестік білдіреді.
UIB өз түлектерін мақтан тұтады және олардың жетістіктері университет тарихының жарқын бір бөлігіне айналатынына сенеді.
