Қазақ халқы үшін Отан ұғымы әрдайым қасиетті болған.
«Туған жерге туыңды тік» деген дана сөздің астарында елге адалдық, жерге жанашырлық, халыққа қызмет ету сияқты ұлы құндылықтар жатыр. Бүгінгі тәуелсіз Қазақстан қоғамында патриотизм ұғымы бұрынғыдан да терең мазмұнға ие болып, ел дамуының негізгі рухани тіректерінің біріне айналды.
Патриотизм – жай ғана ұран немесе сөз емес. Ол – жүректегі сенім, елге деген шынайы сүйіспеншілік, мемлекеттің тағдырына бейжай қарамау. Нағыз отаншыл азамат туған жерінің гүлденуіне еңбекпен үлес қосып, қоғамдағы татулық пен келісімді сақтауға күш салады. Себебі, елдің ертеңі – әрбір азаматтың жауапкершілігімен өлшенеді.
Қазақ халқы ежелден бірлікті бәрінен биік қойған. «Бірлік бар жерде – тірлік бар» деген тәмсіл бүгінгі күнде де өз мәнін жойған жоқ. Қоғамдағы тұрақтылық пен ынтымақ – мемлекеттің дамуы мен өркендеуінің басты кепілі. Ұлт пен ұлысқа, тіл мен дінге бөлінбей, ортақ мақсат жолында жұмыла білу – тәуелсіз Қазақстанның ең үлкен жетістіктерінің бірі.
Қазақ тарихында әр кезеңнің сын-қатерлерінде халқымыздың ең басты тірегі – рухани бірлік болатын. Ат үстінде ғұмыр кешкен бабаларымыз туған жердің әр тал топырағын ардақтап, оны қорғауды ұрпақ алдындағы аманат деп білді. Көшпелі өмірдің қиындықтарына қарамастан, халықтың ынтымағы мен бірлігі мемлекеттің тірегі болғаны да ақиқат. Азаттыққа жету жолындағы күрес те, тәуелсіздікке деген ұмтылыс та ұлттық рухтың беріктігін дәлелдеді. Бүгінгі буын сол аманаттың иесі.
Тәуелсіздік – өткеннің естелігі емес, күн сайын қорғап, нығайтып отыратын құндылық.
Қазіргі кезеңде патриотизмнің мәні кеңейді. Бүгінгі Отанға қызмет ету – тек сөз емес, әрбір азаматтың кәсіби шеберлігін арттыру, білім алу, қоғамға үлес қосу арқылы көрініс табады. Мұғалімнің сапалы білімі, дәрігердің адал қызметі, жұмысшының маңдай тері, жас кәсіпкердің жаңашыл бастамасы – барлығы да ел игілігіне қызмет етеді. Елге деген шынайы сүйіспеншілік – тек патриоттық сезім емес, нақты еңбек пен жауапкершілік арқылы өлшенетін құндылық.
Ал тұрақтылық – бейбіт өмірдің берік қалқаны. Ел ішіндегі тыныштық пен өзара түсіністік экономикалық өсімге де, мәдени өрлеуге де жол ашады. Бірлік пен тұрақтылықты сақтау – тек мемлекеттік саясаттың ғана емес, әрбір азаматтың азаматтық борышы. Күнделікті тұрмыс пен қоғамдық қатынастағы татулық – еліміздің ең сенімді тірегі. Елдің ертеңі әрбір адамның санасы мен әрекетіне байланысты.
Қазақстан – тағдыр тоғыстырған түрлі ұлт пен мәдениеттің ортақ мекені. Осындай көпұлтты қоғамда татулық пен өзара сыйластық ел тұрақтылығының негізгі шартына айналды. Ортақ мақсатқа жұмылған қоғам ғана қиындықты жеңіп, дамудың даңғыл жолына шыға алады. Елдің ынтымағы сақталған жерде мемлекеттің іргесі де берік болады.
Сонымен қатар, жастардың бойында патриоттық рухты қалыптастыру да уақыт талабымен астасып жатады. Отанды сүю тек сөзбен емес, біліммен, еңбекпен, жауапкершілікпен дәлелденеді емес пе. Өз ісін адал атқаратын маман, қоғамға пайдасын тигізетін азамат, ел болашағына сеніммен қарайтын жас буын – мемлекетіміздің ең үлкен байлығы. Сондықтан, әрбір жас өзінің жеке өмірінде де, қоғам алдындағы борышында да патриотизмді көрсетіп, елге пайда келтіретін әрекет жасауға тырысуы тиіс.
Мемлекеттік рәміздерге құрмет – патриотизмнің айқын көрінісі. Көк байрақ, алтын шаңырақты Елтаңба және асқақ Әнұран – халқымыздың тарихы мен тағдырын, тәуелсіз ел ретіндегі болмысын айқындайтын қасиетті белгілер. Рәміздерге құрмет көрсету – мемлекетке деген құрмет, ал мемлекетке құрмет – өз еліңе деген адалдықтың белгісі. Әр азаматтың жүрегінде байрақ желбіреп, әнұранның әуені жүректі қозғағанда, сол елдік сезімнің шынайы тірі екеніне көз жеткізесің.
Қазақы дүниетанымда ел мен жер ұғымы әрдайым қасиетпен сабақтас келеді. Батырлар жырынан бастап, жыраулар толғауына дейін туған жерді қорғау, елдің намысын сақтау идеясы үзілмей жалғасып отырған. Бүгінгі ұрпақ сол аманатты жалғастырып, тәуелсіздіктің қадірін терең түсінуі тиіс. Елге деген махаббат – жүректен туындайтын сезім ғана емес, нақты әрекет арқылы көрінетін қасиет.
Қазіргі қоғамда патриотизм тек ұлттық рухты сақтау емес, сонымен бірге кәсіби жауапкершілік пен азаматтық ұстанымға да негізделеді. Жас ұрпақ өз тарихын танып, мемлекеттік тілін құрметтеп, елдің дамуына үлес қосқан кезде ғана мемлекеттің тұрақтылығы нығаяды. Елге сенген жас – елді өркендетеді, қоғамға үлес қосады. Патриотизм – өткенді дәріптеу ғана емес, болашақты қалыптастыруға ұмтылу.
Қорыта айтқанда, патриотизм, бірлік пен тұрақтылық құндылықтары және мемлекеттік рәміздерге деген құрмет – тәуелсіз Қазақстанның рухани іргетасын қалыптастыратын негізгі ұстанымдар. Елдің қуаты – табиғи байлықта емес, әр азаматтың жүрегіндегі жауапкершілікте. Бірлігі берік, рухы асқақ халық қана уақыт сынынан сүрінбей өтеді.
Отанға адал қызмет ету – әр қазақтың жүрек қалауы, азаматтық парызы және болашақ алдындағы қасиетті жауапкершілігі. Елдің дамуы, мемлекеттің гүлденуі әр азаматтың ісімен тығыз байланысты, ал патриотизм – сол жолдағы мәңгілік тірек.
Қызжібек ӘБДІҒАНИҚЫЗЫ
