Қаржы нарығын реттеу және дамыту агенттігі мәжілісмендердің азаматтардың коллекторларға берешегін сатуға мораторий енгізу идеясын қолдады, бірақ мұндай мәмілелерге толық тыйым салуды әзірге қажет деп санамайды. Бұл туралы аталған агенттіктің төрағасы Мәдина Әбілқасымова айтты.
Мәдина Ерасылқызына депутат Никита Шаталов ұсыныспен шығып, жыл басында коллекторлық агенттіктердің қоржынында 890 мың қарыз алушының 382 млрд теңгеге қарызы бар екенін атап өткен. Никита Сергеевич депутаттардың коллекторларға берешекті сатуға толық тыйым салуды ұсынғанын еске салды. Алайда, үкімет оның орнына мұндай қарыздарды берешек болған күннен бастап 24 ай мерзімге ғана сатуға тыйым салуды ұсынды. Депутаттар бұл мәмілелерге 2026 жылға дейін мораторий енгізуді айтты.
«Біз коллекторлардың жұмыс әдістерін білеміз, негізінен қарызды өндіріп алу. Азаматтардың қарыздарын коллекторларға сатуға толық тыйым салу туралы депутаттардың ұсынысы неліктен қолдау таппады және депутаттардың мораторий енгізу туралы түзетуімен келісесіз бе?» – деп сұрады мәжілісмен қаржы реттеушісінің төрағасынан.
Мәдина Әбілқасымова соңғы жылдары коллекторлардың борыштық портфелінің көлемі шынымен де айтарлықтай өсіп, қазір 891 мың адамға несие бойынша 359 млрд теңгені құрайтынын атап өтті. Сонымен қатар, банктер мен микроқаржы ұйымдарының өздерінің баланстарында проблемалық қарыздар бар. Қаржы реттеушісі басшысының айтуынша, проблемалық қарыздың ерекше өсуі микроқаржы ұйымдарынан онлайн несие алу секторында байқалады.
«Біз мораторий қабылдауды өте қажет деп санаймыз. Сонымен қатар, қазір заңда депутаттар ұсынып отырған маңызды жаңалық – коллекторлар проблемалық қарыздарды реттеуді өздері жүзеге асыруы керек деген талапты енгізіп отыр. Мораторийден басқа, бізде талап бар. Банктер мен микроқаржы ұйымдары берешегі өтелмегеннен кейін 24 ай ішінде проблемалық берешектерді реттеуді жүзеге асырады. Қазіргі уақытта бұл шаралар қаржы ұйымдарын проблемалық қарыздарын қайта құрылымдауға итермелейді деп ойлаймын», – деді Мәдина Әбілқасымова.
Мәдина Ерасылқызы қажет болған жағдайда коллекторларға несие сатуды қатайту үшін қосымша шаралар қарастырылуы мүмкін екенін айтты.
