Білім мен зерттеулерден бастап жасанды интеллект, кәсіпкерлік және халықаралық ынтымақтастыққа дейін: AlmaU жаңа оқу жылын қандай өзгерістермен қарсы алып отыр және университет Алматы мен Орталық Азияның дамуына қандай үлес қосуды көздейді.
Жаңа оқу жылының басталуы – кез келген университет үшін ерекше кезең. Кампусқа студенттер қайта оралып, жаңа академиялық командалар жасақталып, білім беру бағдарламалары мен зерттеу жобалары іске қосылады. Алайда қазіргі заманғы университет үшін жаңа оқу жылы – алдағы даму бағытын айқындауға мүмкіндік беретін жаңа кезең.
Almaty Management University (AlmaU) үшін биылғы оқу жылы университеттің 2025-2028 жылдарға арналған Даму стратегиясы аясында жүзеге асырып келе жатқан ауқымды трансформациясының жалғасы болып отыр.
Стратегияның негізінде дәстүрлі университет моделінен білім беру, ғылым, кәсіпкерлік, технология, бизнес және қоғам өзара ықпалдасатын ашық білім беру экожүйесіне көшу идеясы жатыр. 2028 жылға қарай AlmaU жоғары білім берудің драйвері әрі Орталық Азиядағы білім беру инновацияларының көшбасшысы болуды мақсат етеді.
Бұл университеттің рөлін қайта қарауды білдіреді: білімді жай ғана беру емес, оны жаңа идеяларға, зерттеулерге, жобалар мен нақты шешімдерге айналдыратын орта қалыптастыру.
Болашаққа бағдарланған университет
Бүгінде жоғары білім беру жүйесі жасанды интеллекттің дамуы, цифрландыру, еңбек нарығының өзгеруі және жаңа кәсіби құзыреттерге деген сұраныстың артуы жағдайында трансформациялануда. AlmaU стратегиясы осы өзгерістерге білім беруді жекелендіру және икемді ету, жобалық және кәсіпкерлік оқытуды, цифрлық технологиялар мен пәнаралық тәсілді дамыту арқылы жауап беруді көздейді. Бұл модельдің орталығында студент тұр.
AlmaU-да студент өзінің жеке білім беру траекториясын қалыптастырып, негізгі мамандығын қосымша бағыттармен ұштастырып, XXI ғасырға қажетті дағдыларды дамытуға мүмкіндік алады. Білім беру экожүйесіне Minor, skill-based learning, метадағдыларды, цифрлық және кәсіпкерлік құзыреттерді дамыту, сондай-ақ индустриядағы практикалық оқыту тетіктері кіреді.
Мұндай тәсіл еңбек нарығының қазіргі сұранысын да көрсетеді: жұмыс берушіге дипломы бар маман ғана емес, өзгерістерге бейімделе алатын, шешім табатын және адамдармен тиімді жұмыс істей алатын тұлға қажет.
Сондықтан, AlmaU-дың стратегиялық моделінде жаңа типтегі түлекті – Creator / Transformer, яғни сын-қатерлерді мүмкіндікке айналдырып, өзі өмір сүріп отырған ортаның өзгеруіне үлес қоса алатын тұлғаны қалыптастыруға басымдық беріледі.
Бизнес, технология және креативті индустриялар тоғысындағы университет
Кәсіпкерлік AlmaU білім беру моделінде дәстүрлі түрде маңызды орын алады. Алайда қазіргі таңда бизнесті технологиядан, креативтіліктен және әлеуметтік өзгерістерден бөлек қарастыру мүмкін емес.
Сондықтан, университет студент бизнес-кейстермен, цифрлық технологиялармен, зерттеу құралдарымен және креативті жобалармен қатар жұмыс істей алатын пәнаралық ортаны дамытуды жалғастырып келеді.
2026 жылы өткен AlmaU Management Conference аясында академиялық және бизнес ортаның сарапшылары заманауи менеджменттің трансформациясын – жасанды интеллекттен бастап тұрақты экожүйелерге дейінгі мәселелерді талқылады. Конференция барысында AI, ESG және көшбасшылықтың жаңа модельдеріне ерекше назар аударылды.
Тағы бір маңызды бағыт – креативті индустрияларды дамыту. AlmaU құрамында School of Media and Film жұмыс істейді. Мұнда студенттер медиа, кино және режиссура бағыттарында білім алып, кәсіби дағдыларын дамыта алады. Университет сонымен қатар Creative Industries Center қызметін дамытып, білім, мәдениет, бизнес және шығармашылық бастамалар тоғысатын орта қалыптастыруда.
Білім аудитория шеңберінен шығады
AlmaU-дың жаңа білім беру моделінің негізгі қағидаттарының бірі – білім беру үдерісін аудиториялық сабақтармен шектемей, оны практикалық тәжірибемен және нақты кәсіби міндеттермен ұштастыру.
Студенттік тәжірибе жобаларға, клубтарға, волонтерлік және әлеуметтік бастамаларға қатысуды, бизнес пен индустрия өкілдерімен жұмыс істеуді қамтиды. Университет дуалды және жобалық оқытуды, кәсіпкерлік бағдарламаларды және студенттердің кәсіби ортамен ерте кезеңнен өзара әрекеттесу тетіктерін дамытып келеді.
Индустриямен байланыс AlmaU экожүйесінің маңызды бөлігіне айналып отыр. Университет 50-ден астам компаниямен және салалық серіктестермен ынтымақтастық орнатқан. Серіктестік бастамалардың қатарында Шәкен Айманов атындағы «Қазақфильм» ұлттық киностудиясы , АХҚО, Freedom Finance Insurance, Air Astana және QazPost ұйымдарымен бірлескен жобалар бар.
Осылайша, университет студенттің бүгін үйреніп жатқан білімі мен ертең оны қолдана алатын кәсіби ортасының арасындағы тікелей байланысты қалыптастыруға ұмтылады.
Жасанды интеллект – университеттік ортаның бір бөлігі
AlmaU дамуының стратегиялық бағыттарының бірі – жасанды интеллект пен data–driven тәсілдерін дамыту.
Университетте бұл бағытта жұмыс істеуге қажетті инфрақұрылым қалыптасып келеді. 2025 жылдың соңында AlmaU-да білім беруді, ғылыми зерттеулерді, бизнесті және кәсіпкерлікті біріктіруге бағытталған AlmaU AI Lab – жасанды интеллект орталығы ашылды. Оның қызметі цифрлық құзыреттерді дамытуға, AI құралдарын білім беру және зерттеу үдерістеріне енгізуге, сондай-ақ жаңа практикалық шешімдер әзірлеуге бағытталған.
2026 жылы AlmaU сондай-ақ IAUP Central Asia Conference алаңында әлемдік академиялық қауымдастық өкілдерін жоғары білім берудің жасанды интеллект дәуіріндегі болашағын талқылау үшін біріктірді. Халықаралық ғылыми-практикалық конференция барысында білім беруде AI қолдану, деректерді талдау, цифрлық құзыреттер, академиялық адалдық және генеративті жасанды интеллектті жауапкершілікпен пайдалану мәселелері қарастырылды.
Келесі кезең – AI технологияларын университет үдерістеріне жүйелі түрде енгізу және AI және Data–driven University моделін дамыту.
Зерттеуден нақты шешімдерге дейін
Тағы бір маңызды өзгеріс – ғылыми-зерттеу қызметінің рөлін күшейту. AlmaU стратегиясына сәйкес, университеттің жарияланымдық белсенділігі 60%-ға өскен. Университетте мінез-құлық экономикасы, жасанды интеллект және финтех салаларында зерттеу зертханалары құрылып, заманауи ғылыми инфрақұрылым дамып келеді.
Келесі кезең – зерттеулердің санын ғана арттыру емес, идеядан бастап оны практикалық қолдануға дейін жеткізетін толыққанды жүйе қалыптастыру.
AlmaU стратегиясында ғылым мен бизнестің, қоғам мен зерттеу ортасының арасындағы байланысты қамтамасыз ететін Технологияларды коммерцияландыру орталығын дамыту көзделген. Бұл бағыт зияткерлік меншікті қорғауды, гранттық жобаларды, стартаптарды акселерациялауды, шешімдерді пилоттық режимде сынақтан өткізуді және индустриямен ынтымақтастықты қамтиды.
Осылайша, зерттеу қызметі университеттің кәсіпкерлік экожүйесінің бір бөлігіне біртіндеп айналып келеді: ғылыми идея зерттеу мен прототиптен бастап нақты іске асыруға және коммерцияландыруға дейінгі жолдан өту мүмкіндігіне ие болады.
Кәсіпкерлік – университет мәдениетінің бір бөлігі
AlmaU-да кәсіпкерлік тек жекелеген пәндер немесе бағдарламалармен шектелмейді. Ол университет мәдениетінің негізгі элементтерінің бірі ретінде қарастырылады.
Бүгінде AlmaU студенттік стартаптарды Big Ideas Camp, Tabys Challenge, Babson Global Student Challenge сияқты бастамалар арқылы қолдайды, сондай-ақ әлеуметтік кәсіпкерлік бағытындағы жобаларды дамытады. ERG компаниясымен бірлесіп «Студенттік кәсіпкерлік экожүйесі» бағдарламасы жүзеге асырылуда. Spark Lab, InDrive және Woxsen University ұйымдарымен серіктестік студенттік жобаларды дамытуға қосымша мүмкіндіктер береді.
Алдағы уақытта университет студент идеядан алғашқы прототипке, одан әрі жұмыс істеп тұрған жобаға немесе бизнеске дейінгі толық жолдан өте алатын ортаны қалыптастыруды көздейді. Бұл білім беру нәтижесі туралы түсінікті де өзгертеді. Түлек тек жұмыс іздеуші ғана емес, өз жобасын, командасын және жаңа жұмыс орындарын құра алатын тұлға бола алады.
Болашақ алдындағы жауапкершілік
Бұл трансформацияның маңызды бөлігі – әлеуметтік жауапкершілік. AlmaU тұрақты даму күн тәртібін ілгерілетіп, халықаралық бастамаларға қатысады және Тұрақты даму мақсаттарымен байланысты зерттеу мен білім беру жобаларын жүзеге асырады. Университет UN PRME бастамасының Еуразиялық чаптерін құруға бастамашы болды, ал 2025 жылы Қазақстандағы UN Global Compact бастамасына қосылды.
Тағы бір маңызды бағыт – қоғамдық сенімді дамыту. AlmaU жыл сайын «Қоғамдық сенім және әлеуметтік капитал» халықаралық конференциясын ұйымдастырады. Оның аясында AlmaU Trust Barometer зерттеуі жүргізіледі.
2026 жылғы 10 қыркүйекте AlmaU мен Қазақстандағы БҰҰ-ның Әйелдер жөніндегі құрылымы (UN Women) өзара түсіністік туралы меморандумға қол қойды. Ынтымақтастық гендерлік теңдік қағидаттарын ілгерілетуге, әйелдердің мүмкіндіктерін кеңейтуге және тиісті тәсілдерді білім беру мен институционалдық қызметке интеграциялауға бағытталған.
Осылайша, әлеуметтік жауапкершілік жекелеген бастама емес, университеттің жалпы философиясының бір бөлігіне айналып келеді.
Халықаралық ынтымақтастық – білім беру тәжірибесінің бір бөлігі
Халықаралық ынтымақтастық AlmaU дамуының негізгі бағыттарының бірі болып қала береді. Университет серіктестік желісін кеңейтіп, академиялық ұтқырлық бағдарламалары мен халықаралық зерттеу жобаларына қатысуда.
2026 жылдың жазында AlmaU өкілдері Португалиядағы University of Minho ұйымдастырған International Staff Week бағдарламасына Erasmus+ Staff Mobility for Training аясында қатысты. Іс-шараға 23 елдің университеттерінің өкілдері қатысып, тәжірибе алмасуға және жаңа халықаралық байланыстар орнатуға мүмкіндік берді.
Халықаралық тәжірибе студенттерге қолжетімді. 2026 жылғы наурызда AlmaU командасы Ташкентте өткен International AI in Healthcare Hackathon байқауына қатысып, 54 команданың арасынан 7-орын иеленді. Команда құрамына School of Digital Technologies and Economics және School of Media and Film студенттері кірді. Қатысушылар үшін бұл білімдерін халықаралық бәсекелестік ортада қолданып, жасанды интеллект пен денсаулық сақтау саласындағы өз шешімдерін таныстыруға мүмкіндік берді.
Осылайша, халықаралық құрамдас бөлік студент үшін жеке мүмкіндік қана емес, практикалық білім беру тәжірибесінің бір бөлігіне айналып келеді.
Жаңа оқу жылы – дамудың келесі қадамы
Бұл бағыттардың барлығын бір ортақ идея біріктіреді: AlmaU білім беруді нақты өмірмен, еңбек нарығымен және қоғамның өзекті қажеттіліктерімен тығыз байланыстыратын университет болуға ұмтылады.
Мұнда студент бір уақытта іргелі білім алып, технологияларды меңгеріп, нақты бизнес-кейспен жұмыс істеп, зерттеуге қатысып, стартап іске қосып, халықаралық тәжірибе жинақтап және көшбасшылық құзыреттерін дамыта алады.
Дәл осындай университет моделі AlmaU-дың 2028 жылға дейінгі стратегиясында сипатталған: ашық, кәсіпкерлікке бағдарланған, пәнаралық және адамға бағытталған, Алматының өмірі мен Орталық Азияның дамуына интеграцияланған университет.
Осы тұрғыдан алғанда, жаңа оқу жылы бастау нүктесі ғана емес, қазірдің өзінде басталған трансформацияның кезекті кезеңі болып отыр.
